Operasyonê TSKyî yê vera vakur û rojhelatê Sûrîye de dîyabî destpêkerdene û Trump sînorê Girê Spî û Serêkanî nîşan dabî de hûmara cenazeyanê eskeran zêde bena. Labelê hêrişan de yeno vînayene ke dew û kampê serê sînorî ke Trump nîşan nêdabî zî yenî bombardûmankerdene. Şewa verên 10 cenazeyê eskeran ardî Nêweşxaneyê Dewlete yê Serêkanî. Ame zanayene ke şewa verên 100 endamê OSOyî ameyî kiştene û xo tepîya antî
Hêzên Çekdar yê Tirkîya (TSK) bi fermanê Serekkomar Tayyip Erdoganî 9ê teşrîna verêne de vera vakur û rojhelatê Sûrîye de hêriş û operasyon daye destpêkerdene. TSK hem hewa ra û hem zî bejayî ra hêriş keno. Qezaya Serêkanî ya Riha de komê selefî û radîkal yê bi nameyê Artêşa Sûrîyeya Azade (OSO) vizêr mîyanê bajarî de tûr dayî xo û hewl dayî ke derbazê Serêkanî yê binxete bibî. Şewa verên şerêko çetîn qewimîya. Ame zanayene ke şer de 100 endamê OSOyî ameyî kiştene. Reyna şewa verên 10 cenazeyê eskeranê TSKyî ardî Nêweşxaneyê Dewlete yê Serêkanî. Verê ke operasyon û hêrişê OSOyî dest pêbikerî Trumpî destûr dabî ke tena derbazê Girê Spî û Serêkanî bibî.
Ame zanayene ke nika dewa Yabsê ya qezaya Girê Spî de şer giran o. Hewl dîyeno ke dewa Yabsê de rayîro ke şono Kobanî bêro qeutkerdene. TSK û OSO bi topan û teyareyanê şerî dormeyê Eyn Îsa bombardûman kenî û wazenê ke têkilîya herême û Kobanî yewbînan ra bibirnî. Reyna wazenê ke rayîrê maebnê Eyn Îsa, Tabqa û Raqqa zî yewbînan ra qut bikerî. Rayîro ke şono Heleb zî dewa Yabsê ra derbaz beno. Reyna seba birnayîşê têkilîya Serêkanî û teberî hêrişê dewa Til Xelefî zî kenî. TSK û OSOyî hêrişan de wazenê ke têkilîya pêroyê serê sînorî yewbînan ra bibirnî. Komê girêdayeyê TSKyî dewa Elokî ya girêdayeyê Serêkanî zî kenî hedef. TSK hêrişê vera dewa Elokî de wazeno ke têkilîya mabenê Serêkani û Qamişlo bêra birnayene.
Şewa verên 5 û serê sibayî zî 5 cenazeyanê eskeran ardî Nêweşxaneyê Dewlete yê Serêkanî. Reyna şewa verên 70 endamê OSOyî yê birîndaran zî ardî Nêweşxaneyê Dewlete yê Serêkanî. Şarê Serêkanî dîyar kerd ke şewa verên nizdîyê 100 endamê OSOyî şer de merdî.
