Welatiyên 140 gundên Biradostê ya başûrê Kurdistanê ji bo derketina artêşa tirk ên li ser axa wan bi îmzeya 2 hezar kesî nameyek pêşkêşî Neteweyên Yekbûyî, civaka navneteweyî, hikûmetê Iraqê û herêma Kurdistanê kirin
Welatiyên 140 gundên Herêma Bradostê ya girêdayî bajarê Hewlêr a başûrê Kurdistanê, ji bo derxistina leşkerên dewleta tirk ên li ser xaka wan, nameyek bi îmzeya 2 hezar kesî pêşkêşî Neteweyên Yekbûyî, civaka navneteweyî, hikûmetên Iraqê û herêma Kurdistanê kirin. Welatiyan di nameyê de ragihandin ku ji ber bombardumana balafirên şer ên dewleta tirk a dagirker jiyana wan têk çûye û wiha gotin: “Zozanên me çavkaniya jiyana me ne. Em nikarin biçin zozanên xwe. Şev heya berbangê ji ber liv û tevgera balafirên şer ên dewleta tirk, xew bi çavên zarokên me nakeve.”
Welatiyan di nameya xwe de destnîşan kirin ku rê û pirên wan ji aliyê dewleta tirk ve hatine hilweşandin û ev bang li serokkomarê tirk Recep Tayîp Erdogan kirin: “Eger tu xwe musilman dibînî, bombebarana balafiran a li ser herêmên me rawestîne û leşkerên xwe ji xaka me derxîne. Dewleta tirk 20 km ketiye nav xaka me, bi sedan gundên me vala ne. We gelê Şêladizê, Mêrgesor, Qendîl, Qeladizê, Kejek û Kendekolan qir kir. Ji wê kuştinê we çi bi dest xistiye. Tenê li Kendekolanê we 40 welatî qetil kirin.”
Welatiyan aqûbeta Sedam Husên bi bîr xistin û ev tişt anî ziman: “Ger weke Serokê rejîma Baasê Sedam Husên bi hezaran kes qetil jî bike, wê di encam de çarenûsa Erdogan weke ya Sedam Husên be. Ji ber wê em dibêjin tenê rêya çareseriyê aştî ye.”
Gundiyên Bradostê bal kişandin ser hinceta bomberana dewleta tirk a li ser xaka wan û wiha gotin: “PKK li herêmên me nîn e. Em li gund û warên xwe ne. PKK di nav me de nîne û tu têkiliya me bi PKK’ê re jî nîn e.”
Di dawî de welatiyan aşkera kirin ku ew ji ber zext û zoriyên hinek aliyan naxwazin navên xwe aşkera bikin.
