Înîsîyatîfê Rojnamegeranê Azadan (ÎRA) raporê menga Gulane eşkera kerd. Goreyê roparî menga Gulane de 6 rojnamegerî ameyî destbendkerdene û 2 rojnamegerî zî ameyî girewtene
Înîsîyatîfê Rojnamegeranê Azadan (ÎRA) raporê Gulane yê binpankerdişê heqanê rojnamegeran rayapêroyî reyde pare kerd. ÎRA, ard ziwan ke polîtîkayê şîdetî yê îqtîdarê AKPyî yê vera medyaya ke sere nênana ro dewam kenê.
Eşkerayîya Înîsîyatîfê Rojnamegeranê Azadan (ÎRA) wina ya:
“Meselaya ‘azadîya çapemenîye û îfadeyî’ ya ke binê nameyê ‘Reformê Hukmî’ de yena îfadekerdene ganî goreyê reformê esasî bêra rastkerdene û bi qanûnan bêro pawitene. Goreyê naye zî ganî her çî ra ver 157 rojnamegerê ke girewtî yê, bêrê veradayene. Ganî heme rojnamegerê ke yenê muhakemekerdene, muhakemekerdişê înan biqedîyayo. Na menge de 9 rojnamegerê Azadîya Welatî û derheqê heme xebatkaranê ci de cipersayîş ame akerdene. Ma wazenê, cipersayîşê ke derheqê Wayîrê Îmtîyazî yê Rojnameyê Azadîya Welatî, 4 mudiranê nuştişî, edîtor, nuştox, vilakerdox, şofor û werdpewjî de ameyê akerdene bêrê vindernayene. Cipersayîşê ke derheqê rojnameger û edîtoranê Azadîya Welatî, Bişar Tûrgût, Mehmet Çetîn Altûn, Metîn Gul, Ferît Koyluoglû, Îsmaîl Çoban, Yildirim Temel, Zeynel Abîdîn Bûlût, Zafer Tuzun, Rojhat Bîlmezî de ameyê akerdene bêrê qedênayene.”
Binpankerdişê heqanê rojnamegeran ê Menga Gulane wina yo:
6 rojnamegerî ameî destbendkerdene
Derheqê 9 rojnamegeran de cipersayîş ame akerdene
44 rojnamegerî ameyî muhakemekerdene
10 rojnamegeran rê caza ameye birnayene
2 rojnamegerî ameyî girewtene
40 reyî zext bi rojnamegeran ame kerdene. Fotograf û dîmenê ke înan qeyd kerdîbî, ameyî destsernayene.
5 rojnamegeran rê hêriş ame kerdene
2 rojnamegerî ameyî veradayene. AMED
