Kedkar û karkeran ver bi Meydanê Taksîmî Saraçhane ra dest pê rayraşîyayîşî krd. Polîsan hêrişê girseyan kerd. Êlih û Wan de zî çalakîyê 1ê Gulane dewam kenê.
Stenbol
Serkêşîya DÎSK, KESK, TMMOB û TTByî de rixmê qedexeyê walîtîye zî kedkar û karkeran ver bi Meydanê Taksîmî Saraçhane ra dest pê rayraşîyayîşî kerd. Polîsan girse girewt binê ablûqa.
Kortejî bi sloganan dekewtî rayraşîyayîşî. TJA zî tede têgêrayîşê cinîyan bi sloganê ”Jin, Jiyan, Azadî” verê xo danê warî.
Serkêşîya Hemserek Tuncer Bakirhanî de heyetê DEM Partî dekewt warî. Ciwanan bi slogananê sey Bijî Serok Apo”, “Be serok jiyan nabe”û “Bijî berxwedana zindanan” heyet pêşwazî kerd.
Bakirhanî Saraçhane de xîtabê girseyî kerd û vat: ”Bijî Yekê Gulanê. Ma sey DEM Partî tim hetê kedkar û karkeran de yê. Ma seba paştdayîşî tîya de yê. Ma do pîya, bi têkoşînê rêxistinkerdeyî heqanê xo bigêrê.”
Kedkarî ver bi Taksîmî şinê. Polîsan bi guleyanê plastîkan û gazî hêrişê girseyî kerd. Xeylê kesî ameyî destbendkerdene. Girseyî vera hêrişanê polîsan xo ver danê.
Êlih
Êlih de girseyî hêverî seba mitîngê 1ê Gulane Bulwarê Turgut Ozalî de kom bîyî. Tîya ra girseyî verê xo danê Parka 8ê Adare. Hemsereka DBPyî Çîgdem Kiliçgun Uçar, Sekretera KESKî Done Gevher û Serekê Şubeyê êlihî yê Petrol-Îşî Veysel Kartal do mîtîng de qisey bikerê. Bi hezaran kesî meydan de bi sloganan govende kenê.
Wan
Wan de mîtîngê bi şîarê ”Kede yê ma ya, vate ê ma yo” bi rayraşîyayîşê kortejan dewam keno. Mîtîng Parka Musa Anterî de do bêro kerdene. Mîtîng de Serekê KESKî Ahmet Karagoz, GHemşaredara Wanî Neslîhane Şedal, Hemserekê DBPyî Keskîn Bayindir û Hemsereka DEM PArtî Tulaye Hatîmogullari do qisey bikerê. Fazil Demîr, Koma Janya û Babetna zî do bivejîyê sehne ser.
