Wexto ke polîtîka yew heqîqete ser o, menfeet û raştîya şaran ser o awan nêbo, yew çîy tira sadir nêbeno. Wexto ke sîyaset raştey û heqîqeta şaran ser o awan nêbo; meseleyê hemwelatîyan çareser nêbenê.
Semedo ke wayîrê no tewir yew sîyesetî, weçînayoxanê xo konsolîde bikê, yan bazirganeya/bazirganîya dîn û nîjadperestey kenê, yan zî bazirganîya xeyalan kenê. Eke na zî bes nêbo; na ray polîtîkaya cengawerey dekenê dewre. Na zî înan tatmîn nêko; na ray bazirganîya xeyalan dekenê dewre. Yanî semodo ke îqtîdar de bimanê, heme wext nê argûmanan şuxûlnenê.
Nê aşmanê peynîyan de, zafê ey bazirganîya xeyalan kenê. Sosê nê xeyalan zî “Mahalî û Mîlî” yo. Nê estanêkê xeyalan, “Mahalî û Mîlî” nêbê; terafdar nêveynenê. La heqîqete, kam roj bibo, vejîna raşte. Yanî bazirganîya xeyalan veng de vejîna. Mesela şeş serrî ra vîyar vat ke;” Projeyê otomobîla ma ya ke hewa ra şona dîqetê Japonya anto û seba na otomobîle teklîf dayo.” Şeş serrî vîyartê la hima zî ina/wina hewa yew otomobîle nêvejîyaya. Na otomobîle nêvejîyay, la na ray mîzgînîya “Gaza Karadenîzî/Gaza Behrê Sîyayî” dekerde dewre.
Ganî hetan penîya aşma çeleyî, 40 mîlyon aşiyê Korona biameynê, la aşma çeleyî qedîyaya hima zî no aşi nêameyo. Vanê ke; “Ma hetan aşmanê payîzî aşiyo “Mahalî û Mîlî” vejenê.” Ma ko penîya nê vatişê înan zî veynê. No îqtîdar, bazirganîya xeyalan de, tam gaz dewam keno. Xora vanê ke; “Vera averşîyayîşê îqtîdarê AKP/MHP, heme dinya çimnebarey/qisqancey kena.” Goya rayîrê înan de hinê yewer nişno vindero. Hetta tam gaz dewam kenê û vanê ke; “Ma nizdî ra astronotanê xo raykenê aşme. Yanî vanê ke; wa şarê ma sebir biko, ma hedreyê xo kenê ke 2023î de astrotanê xo raykenê feza. Şarê ma zafê ey veyşaney ra nefese înan ra bîye bîro zî, goya pey nê xeyelan pîzeyê feqîr û fuqarayan mird kenê. Xora tayê feqîr fûqareyî zî bawer kenê û vanê ke; “wa welat weş bo.”
Şarê ma bêkar û bêîş bibo zî, çopra çîyê werî top/kom biko zî vanê ke “wa welat weş bo.” Çunku wexto ke ceng bibo persayîşê fîyatê firingîyan îxanet hesibêno. Tabî goreyê înan, hemwelatîyê Tirkîya cahîl mendê, hima zî fîyatê yew fîşeke bonder nêbîyê. Bi des mîlyonan merdimi bêkar û bêgure bibê zî, mesref û şatafatê sarayan û mesrefê cengî persayîş; yew xayîneya pîle hesibêna. Çunku îtîbar ra tesarrûf nêbeno. Çunku goreyê înan; dostê Tirkîya çin o, vera dinya yew têkoşîna mendîş û çinbîyayîşî dana. Goreyê înan, Behrê Sipîy/Akdenîz ra hetan Behrê Egeyî, Sûrîye ra hetan Lîbya, hetan Azerbeycan, hetan Başûr; yew şer dîno. Goreyê nê muqtedîran, yew meseleya beka esta. Goreyê muqtedîran; vera Ewropa, vera Amerîka, yanî vera heme duwelîyan yew têkoşîna pîle dîna. Hemwalatîyê Tirkîya; beno ke veyşan bo, beno ke çop ro miqat bo, beno ke nêweş bo, beno ke bimro, xemê înan nîyo. Xora nê cengan de, gedeyê xizanan zeh benê. Heme roj cenazeyê nê xizanan bêrê zî nê cenazeyan ser o zî sîyaseto hemaset tam gaz berdewam beno.
Yew het ra weçînayoxanê xo, bi dînê îslamî, bi nîjadperestey û estnikanê xeyalan konsolîde kenê. Yewna het ra wazenê ke mûxalîfan, demokratan û kurdan zî bi çiwa zorî ‘bîyarê hîdayet’. Tirkîya de, muqtedîrî wexto ke îcab biko; merdimanê mafya şuxûlnenê. Xora ra-ray nê merdimê mafya, resmen merdiman tehdît kenê. Dadger û dozgerî vera nê tehdîtan bêveng manenê. Bellî yo ke hinê heq huqûq û edalet nêmendo. Wexto ke îcab biko; faşîstan, wexto ke îcab biko; dîncîyanê fanatîkan şuxûlnenê.
Yew heqîqete esta ke, hemwelatî; semedo ko cuyê xo îdame biko, ganî muhtacê yewerî nêbo û sey merdiman weşîya xo bişeref berdewam biko. Hetan key veyşaney, hetan key xizaney? Yanî hetan peynî, hemwelatî; pey bazirganîya dînî û nîjadperestey, pey bazirganîya xeyalan nêxapînê.
Yewna heqîqete esta ke, meseleyê hemwelatîyan; pey bazirganîya dîn û nîjadperestey nê, pey polîtîkaya cengî nê, pey aşîtî û demokrasî çareser benê.
