Xizmên Windayan û rêveberên Komeleya Mafê Mirovan (ÎHD) a Şaxa Amedê di hefteya 683’yemîn de li Parka Koşuyoluyê li aqûbeta windayan pirsîn û xwestin kujer werin darizandin. Xizmên windayan vê hefteyê li aqûbeta nûçegihanê Ozgur Gundemê Nazim Baboglu yê di 2’yê adara 1994’an de hat windakirin pirsîn.
Endam û rêveberên Komeleya Rojnamevanan a Dîcle Firatê û parêzvanên mafê mirovan tevli çalakiyê bûn û wêneyên windayan hildan.
Serokê ÎHD’a Amedê Abdullah Zeytûn destnîşan kir ku wê têkoşîna a ji bo aqûbeta windayan berdewam bike.
Hevserokê Komeleya Rojnamevanan Serdar Altan jî bi silavkirina Dayikên Şemiyê û Xizmên Windayan dest bi axaftina xwe kir û ji bo ew li aqûbeta Babaoglu bipirsin tevli çalakiyê bûne. Altan destnîşan kir ku dibe ku kujeran Nazim, Cengiz, Hafiz û Apê Mûsa qetil kirin û winda kirin lê têkoşîn û pênûsa wan li erdê nema.
Kekê Baboglu, Îhsan Babaoglu jî di çalakiyê de axivî û anî ziman ku birayê wî Nazim rastiyan dinivîsand û lewma hat windakirin û li Sivêregê ji roja hatiye windakirin vir ve agahî jê nehatiye girtin. Baboglu anî ziman ku nedîtina birayê wî nazim şerma dewletê ye û got: “Kujerên birayê min Nazim diyar in. Em ê dest ji têkoşîna xwe bernedin.”
Rêveberê ÎHD’a Amedê Firat Akdenîz serpêhatiya windakirna Babaoglu xwend û bal kişand ser pêvajoya windakirina wî.
Piştî axaftinan ji bo windayan kêliyek çalakiya rûniştinê hat lidarxistin.
Li Êlihê jî Xizmên Windayan û rêveberên Şaxa ÎHD’ê di hefteya 520’emîn de li serê Kolana Gulistanê li ber Peykerê Mafê Mirovan daxuyanî dan. Vê hefteyê li aqûbeta Mehmet Mungan ê di 18’ê adara 1998’an de li navçeya Silopiya Şirnexê hat windakirin, pirsîn. Rêveberê ÎHD’ê Abdurrezak Katmaz di çalakiyê de axivî û bal kişand ser pêvajoya windakirina Mungan.
Piştî daxuyaniyê çalakiya rûniştinê hat lidarxistin.
Nazim Baboglu li ser gora xwe ya li Rihayê jî hat bibîranîn. Rêveberên HDP’ê, rojnamevan û malbata wî beşdarî bernameya bîranînê bû. Wêne û qerenfîl danîn ser gora Baboglu û rêz hat girtin. Hevserokê HDP’a Rihayê Ziya Çalişkan di bîranînê de axivî û destnîşan kir ku Nazim Baboglu sembola ragihandina rastiyan bû û ew ê her li têkoşîna wî xwedî derkevin
Parlamentera HDP’ê Ayşe Surucu jî axivî û destnîşan kir ku ji wan rojên ku rojnamevanên kurd dihatin qetilkirin heta îro tu tiştek neguheriyê û ew hemû xebatkarên çapemeniya azad bibîr tînin.
‘Nikaribûn bêdeng bikin’
Kekê Baboglu, Cemal Baboglu jî axivî û anî ziman ku ji ber birayê wî rastiyan digihand xelkê hat qetilkirin û lê kujer û dewletê çi kir jî nikaribûn rastiya gelê kurd û rojnamevanên kurd-çapemeniya azad biqedînin û bêdeng bikin.
Bîranîn bi berzkirina dirûşma “Şehîd namirin” bi dawî bû.
