Bişar Bîlen ê li Girtîgeha Tîpa T a Aksarayê dimîne, bi rêya telefonê li gel bavê xwe Çeto Bîlen re axivî û diyar kir ku li dijî hejmartina li ser pêyan a li ser wan tê sepandin li gel Mehmet Fatîh Bîngol û Umît Temûr re ji 17’ê tîrmehê ve ketine greva birçîbûnê ya bêdem û bêdorveger.
Bav Bîlen anî ziman ku kurê wî yê 12 sal in li girtîgehê ye gardiyanan êrîşî wan kiriye.
Bav Bîlen diyar kir ku berê jî kurê wî li Girtîgeha Tîpa T a Tarsûsê li dijî hejmartina li ser pêyan ketibû grevê û 21’ê sibatê şandin Girtîgeha Aksarayê. Bav Bîlen destnîşan kir ku dema di hevdîtinê de dît ku destê kurê wî bi paçê birînan hatiye pêçan û diyar kir ku kurê wî ev gotiye: “Dema em anîn vir li me dan. Gardiyanan êrîşî me kirin û niha li hucreya yekkesî me.”
Bîlen anî ziman ku kurê wî ji ber pêkanînên kêfî li hucreya yek kesî tê ragirtin û ev tişt anî ziman: “Kurê min berî bi 15 rojan li qawîşekî 6 kesî diman. Di hevdîtina me ya roja înê de diyar kir ku gardiyana ji bo wan gotiye; ‘rabin ser pêyan’ hejmartina li ser pêyan li ser wan sepandiye. Bişar li dijî vê derketiye û ji ber vê ketiye greva birçîbûnê. Piştî ku daxwaznameya ketina greva birçîbûnê dan rêveberiya girtîgehê û şûnde gardiyan avêtine ser qawişê û li gel wî êrîşî du hevalên wî jî kirine, piştre jî avêtine hucreyên yekkesî. Ji bo kurê min gotine ku; An hûnê bi daxwaza me bikin an jî em ê vê yekê li ser we bikin.”
Her wiha bav Bîlen bang li parêzvanên mafê mirovan kir ku divê her kes xwedî li van ciwanan derbikevin. MÊRSÎN
