Ji bo tecrîda li ser Rêberê Gelê Kurd Abdullah Ocalan bi dawî bibe li Girtîgeha Tîpa T a Dîlokê 3 girtiyên din dest bi greva birçîbûnê ya bêdem-bêdorveger kirin. Li Girtîgeha Meletiyê jî 4 girtî 25 roj in di greva birçîbûnê de ne
Berxwedana grevên birçîbûnê ku ji bo tecrîda li ser Rêberê Gelê Kurd Abdullah Ocalan were rakirin hatiye destpêkirin berbelav dibin.
Li Girtîgeha Dîlokê girtiyên bi navê Abdullah Kûrt, Ûgûr Coşar û Şaban Yener dest bi greva birçîbûnê ya bêdem-bêdorveger kirin. Dayika girtiyê bi navê Abdullah Kûrt, Nazife Kûrt diyar kir ku bi rêya telefonê bi kurê xwe re axiviye û kurê wê jê re gotiye: “28’ê çileyê bi hevalê xwe yê bi navê Ûgûr Coşar û Şaban Yener re li dijî tecrîdkirina Rêberê Gelê Kurd Abdullah Ocalan dest bi greva birçîbûnê ya bêdem-bêdorveger dikim.”
Li Girtîgeha Meletiyê jî 25 roj in girtiyê bi navê Mehmet Bilgin Ûgûz, Mazlûm Dînç, Şemsettîn Aykaç û Sertaç Çelîk li dijî tecrîdkirina Abdullah Ocalan di greva birçîbûnê ya bêdem-bêdorveger de ne. AMED
