Duh bi şev leşkerên artêşa tirk a dagirker û çeteyên wê ji nuqteyên xwe yên gundên Bab El-Xêr û Dawudiyê yên dagirkirî, gundên Esediyê, Rebîat, Mehremla, Til Emîr, Mezra, Til Werd û taxên rojavayê navenda bajarojê Zirganê û sûka wê bi dijwarî topbaran kirin. Di encama topbarana çeteyan de ji gundê Rebîatê ji malbatekê jina bi navê Melka Ehmed Îd (30), dayika wê Fesla Îd (60) û Salih Hemîd El-Hisên (60) şehîd bûn. Her wiha Cûdî Îd (4) Cûrî Îd (11) û Ehmed Îd (8) jî birîndar bûn.
Têkildarî topbarana û qetliama çeteyan Fermandariya Giştî ya Hêzên Ewlekatiya Hundirîn daxuyanî da û ev agahî parve kir: “Ji demeke dirêj ve artêşa tirk a dagirker û çeteyên wê bajarokê Zirganê û gundên wê topbaran dikin. Bi van êrîşan hewl didin niştecihên wê koçber bikin, mîna ku li bajarên Efrîn, Girê Spî û Serêkaniyê kirine. Artêşa tirk êvara sêşemê (21’ê Kanûnê) bi hemû cûreyên top, obîs û moşekan bajarok topbaran kir. Derdora 30 top li bajarok ketin. Di encama topbarana hovane de ziyanên mezin gihaştin milkên sivîlan, mêrekî bi temen û du jin şehîd bûn û 10 sivîlên din birîndar bûn. Birîndar rakirin nexweşxaneyan.
Em Hêzên Ewlekariya Hundirîn van kiryarên bi sûc ên li dijî şêniyên me yên li bajarokê Zirganê şermezar dikin û bang li civata navneteweyî dikin ku bi lez bikeve tevgerê, li hemberî wehşiyeta dewleta tirk û leşkerên wê bisekine û herikîna xwîna sivîlan rawestîne.” QAMIŞLO
