Seba vînayîşê Muhammed Ozcanî yo ke 4 rojî verî awa Royê Dîcle de şi, cigêrayîşî dewam kenê. Pî Hanîfî Ozcanî seba hîsdarîye veng da selahîyetdaran
Nizdê Pirdê Kabê yê pabesteyê qezaya Sûrî ya Amedî 20ê Hezîrane de Muhammed Ozcan (18) seba ke xo Royê Dîcle de bişo kewt royî û awe de şi. Seba vînayîşê Ozcanî xebatê cigêrayîşî dewam kenê. Grûbanê Cigêrayîş û Xelesnayîşî yê Daîreya Îtfaîye ya Şaredarîya Bajarê Girdî ya Amedî 4 rojî yo cigêrayîş kenê la hewna zî nêresayê netîceyêk. Hetêk ra cigêrayîş dewam keno, hetêna ra zî merdimê Ozcanî qeraxê royî de vindertişê xo domnenê.
Pîyê Ozcanî, Hanîfî Ozcanî yo ke bendeyê vînayîşê lajê xo yo wina va: “Qewimîyayîş gama ke lajê mi embazanê xo dir yeno pîknîk virazêno. Gama ke xo erzena awe aye dir şino. Rixmê cehdanê hemwelatijanê dormeyî zî lajê mi nêno xelesnayene û awe de xeneqêno.”
‘Grûbê cigêrayîşî kemî yê’
Ozcanî da zanayene ke o 4 rojî yo bendeyê vînayîşê lajê xo yo û va: “Hewna ma tu netîce nêfînaya dest. Grûbê cigêrayîşî kemî yê. Ez veng dana heme selahîyetdaran, seba vînayîşê lajê mi wa hetkarîye bikerê. Teberê çend grûban de çew hetkarî nêkeno. Ez û merdimê xo çend rojî yo tîya perîşan bîyî. Wa tavilî ma rê hetkarî bikerê.” AMED
