Duh êvarê nûçegihanên Ajansa Rojnewsê Berhem Letîf û Birwa Eshed dema ku xwepêşandanên Silêmaniyê dişopandin hatin binçavkirin û heta niha tu agahî ji wan nayê girtin.
Îro Sekrterê Şaxa Sendîkaya Rojnamegeran a Silêmaniyê Karwan Enwer û Rêveberê Navenda Metro Rehman Xerîb der barê mijarê de agahî dan Rojnewsê û diyar kirin ku her du nûçegihanên wan ji aliyê hêzên ewlehiyê ve hatine binçavkirin.
Her wiha Navenda Metro ya ji bo parastina mafên rojnamegeran, aşkera kir ji bilî her du nûçegihanên Rojnewsê, nûçegihanê kanala Bexdadiye yê bi navê Ebas Mihemed û nûçegihanê kanala El Şerqiya Erebî Rajan Macid jî hatine binçavkirin.
Rêveberê Navenda Metro Rehman Xerîb da zanîn her çar rojnameger duh piştî windabûn, wan lêkolîn kir û piştre derket ku ew ji aliyê hêzên ewlehiyê ve hatine binçavkirin.
Her wiha destnîşan kir ku wan li ser mijarê peywendî li gel Ofîsa Cîgirê Serokwezîrê Herêmê Qubad Talebanî jî kiriye, ofîsê ji wan re ragihandiye Qubad Talebanî gelek caran daxwaz ji hêzên ewlehiyê kiriye ku rojanamegeran li ser karên wan neyên girtin.
Rêveberê Navenda Metro da zanîn ew li bendê ne her çar rojnameger îro werin berdan.
Sekrterê Şaxa Sendîkaya Rojnamegeran a Silêmaniyê Karwan Enwer jî diyar kir ku ji bo berdana rojnamegerên girtî ew li gel aliyên peywendîdar di nava danûstandinan de ne. SILÊMANÎ
