PKK’ê 43 sal li pey xwe hişt û ket sala 44’an. Tam 43 sal in, ji kêliya yekem heta vê gavê her kesê tev li PKK’ê bû; bi ruheke fedayî û şoreşgerî li ber xwe da, têkoşiya.
43 sal qonaxeke dirêj û gelek pêngavên dîrokî li xwe girtiye. Ji gava yekem a ‘Kurdistan mêtingeh e’ heta avakirina partiyê ya 27’ê Mijdara 1978’an a destpêkirina Têkoşîna Rizgariya Neteweyî ya Kurdistanê û şerê çekdarî ya 15’ê Tebaxa 1984’an ve bûn hîmên esasî yên ku PKK’ê xwe li ser bigire û bi pêşve biçe. Bi taybet berxwedana Zindana Amedê, çalakiya fedayî ya Mazlûm Dogan, Çalakiya Çaran û dîsa Berxwedana Greva Rojiya Mirinê ya 14’ê Tîrmeha 1982’an PKK di warê îdeolojî û bîrdoziya kadrobûyînê de kamil kir, gihand asta fedayîtî ya serketinê teqez bike û li ber dagirker û celadan serî û çok nedane.
Vê berxwedanê PKK li ser pêyan hişt û berê wê da şoreşa çekdarî; vegera li Kurdistan û şerê azadiyê.
Bi teqez ev meşa 43 salan wer hêsan nebû, di serî de PKK’ê lehengên xwe yên herî fedekar û dilsozên azadiyê û gelê kurd jî ewladên xwe yên herî hêja û fedekar; ji bo azadiyê kirin qurban. Berdêla 43 salan gelek giran û bi êş e, vegotin, ziman ditevize, peyv û hevok têrê nakin. Ne bi stran, ne bi pirtûk ne jî bi romanekê dikarî wesif û pênase bikî. Ji bo wê Serok Apo ji bo PKK’ê gotina ‘PKK romaneke hê nehatiye nivîsîn’ bi kar aniye. Heta PKK negihêje azadî û serfiraziya gelê kurd, gelên Rojhilata Navîn wê ev roman bi dawî nebe.
Berxwedana sala 43’an bi heybet hat kirin, wê deh qatî wê sala 44’an dom bike. PKK a kesê nediwêra navê wê hilde, îro li seranserî welat û derveyî welat weke muxatab tê girtin, rêz ji bo wê tê girtin. PKK a ji bo azadiya gelê kurd dest bi têkoşînê kir, îro ji bo azadiya gelên Rojhilata Navîn û mirovahiya cîhanê şer dike.
Encama têkoşîna 43 salan kir ku îro li cîhanê di serî de daxwaza azadiya Rêber Apo bê kirin û PKK’ê ji ‘lîsteya terorê’ bê derxistin. PKK îro ne weke ‘terorîst’ aliyek ê şer tê dîtin û piştevanî tê kirin. Ev yek wer hêsan nebû. Dema mirov li dû xwe dinêre bibîne, di nava van 43 salan de çiqas berdêlên giranbûha û dîsa encamên pir mezin bi dest xistine. Ji bo me kurdan her kêliya 43 salan pîroz û bi nirx in. Her kêlî me şehîdek da û wilo me xwe mezin kir û gav avêt. Ji bo wê her roja partiyê pîroz û zêrîn e.
Em ketin sala 44’an. Ji bo vê meşê bi azadiyê tacîdar bikin, ji her kêliyê divê xurtir, serî rakin; dijmin têk bibin. Dewleta tirk a dagirker-qirker li Herêmên Parastinê yên Medyayê li Zap, Metîna, Avaşîn, Heftanîn û hwd.. têk çû. Li zindanan faşîzm li ber berxwedan û vîna dîlên azadiyê hilweşiya. Ji bo wê hêz û taqeta dagirker şer bike nemaye, divê heyf û tola gelê kurd ji wan hildin, li erdê bidin.
Werin em bi hev re serê sala 44 bikin sala azadiya Rêber Apo, dîlên azadiyê, serfiraziya gelê kurd û Kurdistanê. Ji bo wê li her dera welat û taybet derveyî welat bikin ku PKK ji lîsteya ‘terorê’ bê derxistin û di warê parastina mafê gelê kurd de dîplomasiyeke xurt ava bikin. Di serî de jinên ciwan û ciwanên kurd bibin parêzvan û avakarên sîstema Modernîteya Demokratîk a mirovahiyê.
Werin em dest bidin destê hev, bi hev re li wareke azad û bi Rêbertiyek azad re, li ser bingehê heqîqeta jin û jiyana azad bijîn…
