Hunermend Mîkal Aslan derheqê hêrişanê serê Rayîrberîya Xosere ya Vakur û Rojhelatê Surîye de va: “Ya muhîm yewîya mabenê kurdan de ya. Şêwirmendê moda Barbaros Şansal zî ard ziwan ke tu feydeyê şerî tu kesêk rê çin o û va: “Verê her çî aştîye.”
Hêrişê serê Rayîrberîya Xosere ya Vakur û Rojhelatê Surîye 5 rojî yo ke dewam keno. Xeylê hetan ra reaksîyonî virazîyenî. Hunermend Mîkal Aslan, şêwirmendê moda Barbaros Şansal û hunermend Levent Uzumcuyî derheqê hêrişan de qisey kerdî. Hunermend Mîkal Aslan derheqê hêrişanê serê Rayîrberîya Xosere ya Vakur û Rojhelatê Surîye de va: “Ya muhîm yewîya mabenê kurdan de ya. Şêwirmendê moda Barbaros Şansal zî ard ziwan ke tu feydeyê şerî tu kesêk rê çin o û va: “Verê her çî aştîye.” Hunermendan seba aştîye veng kerdî.
Hunermend Mîkaîl Aslan va: “Bin ê têgêrayîşan xeta çaresernêkerdişî cografyaya ma de ameye awankerdene. Rojhelatê Mîyanenî bîyo berê cehennemî. Dinya de her kes no şerî de hetê xo dîyar keno. Herême de dewletê ke bîyî çete nêwazenî problemê kurd çareser bibo û qirkerdişê fîzîkî û kulturî kurdan ser de ferz kenî. Ganî şarê herême vera nê çeteyan de alternatîfek virazo. Ya muhîm zî yewîya mabenê kurdan a.”
Feydeyê şerî tu kesêk rê çin o
Şêwirmendê moda Barbaros Şansal zî ard ziwan ke tu feydeyê şerî tu kesêk rê çin o û va: “Verê her çî aştîye. Şer vîşêrê merg û talanî tu çîyêk nîyo. Şer xo dima dejê giranan vera dano. Beno sebebê nefret û kînî. Seserra 21. de çîyêko winasî dûrê aqilî yo.”
Ma ewja de yewbînan kişenî
Hunermend Levent Uzumcu zî da zanayene ke dinya de kesê ke hêz destê înan de yî, hewl danî ke komel înan biweçîno û eke nêweçîno zî sey xayîn îlan kenî û va: “No sîstem timî wina yo. Nika zî Tirkîye de çîyêko winasî esto. Ma ewja de yewbînan kişenî. Ma benî dişmenê yewbînan. Tena amacêk înan esto o zî wazenê ke Iraq, Mûsûl û Kerkûkî de 250 serran zî petrol destê xo de bigîrî. Kam zano ke 250 serrî dima çi beno çi nêbeno. Cuyêka merdimîye heqê her kesî ya. ANQARA
