Daristananê Karacehenemî yê qezaya Kanîreşî yê Çewlîgî de birnayîşê daran dewam keno. 86 rêxistinanê komelê sivîlî yê Çewlîgî Karacehenem de eşkerayîyêka hempare dayî. Temsîlkarê rêxistinanê komelê sivîlî, parlementerê Partîya Demokratîke ya Şaran (HDP) yê Çewlîgî Erdal Aydemîr, îdarekarê HDPyî yê Çewlîgî û xeylêk hemwelatîyî zî tewrê eşkerayîye bîyî.
Serekê Komeleya Paştdayîşî û Kulturî ya Dewa Saxnîsî Abdulbakî Ayikî eşkerayîye wende. Ayikî da zanayene ke îhaleya birnayîşê daran ameya dayene muxtarê dewa Talvarî Tayyîp Bulakî la îhale sîstemê EKAPî de heta roja îhale nêamebî dîyene. Ayikî pare kerd ke îhale bi bedelê 76 hezar û 803 TL dîyaya û verî ke wextê îtîrazî biqedo xebata birnayîşî dest pêkerde. Ayikî ard ziwan ke waştişnameyê îtîrazî yê dewijan zî hetê Mudirîya Karanê Daristanan ra nêame qebulkerdene.
Ayikî vist vîrî ke Walîtîya Çewlîgî îdîa kena ke darî pê birnayîşî yenê ciwankerdene û vat: ”No warê daristanan mîyanê ekosîstemî de bi hawayêkê xozayî virazîyayo ke warê winasênî de karê ciwankerdişî nênê kerdene. Rixmê ney zî darî birîyenî, binê nameyê ‘warê qedexeyî’ de destûr nêdîyeno ke heyet debikewo daristanan. Şima kamî ra çita nimnenê? Meclîs de Peymana Awhewayî ya Parisî yena îmzakerdene la Çewlîg de qirkerdişo ekolojîk esto. Çimeyê ma yê binerdî, çimeyê ma yê sererdî, awa ma û heywanê ma semedo ke tay kesî bibê zengîn yenê pêşkêşkerdene. ”
Rêxistinan venga selahîyetdaran da ke wa cade qirkerdişê daran vindarnê. ÇEWLÎG
