Merkezê Xeberan
Ozan Serdaro ke 40 serrî yo bi kirdkî (kirmanckî) muzîk keno albumê xo yo dîjîtal o verên ê bi nameyê ‘Zerya’ vet. Zerya de 25 deyîrî estê û pêro deyîrî kirdkî yê. Album hetê Deutsch-Kurdisches Kulturinstitutî ra ame amadekerdene.
Beşêkê albumî de deyîrê klasîkî yê Dêrsimî beşê bînî de zî deyîrê Ozan Serdarî ca gênê. Nameyê deyîranê nê albumî nê yê: Zerya, Bê Gula Mi Bê, Mavi Xêr Dî, Pepug, Serê Sodirdê, Xido Dizdo, Zeryam Vêsê Pêsê Cirê, Paris, Derdê Zerî, Vorê Vorena, Ax Pepug Mirê Biwano, Rozê Yêna, Zerdê, Hetê Mino Zû Dêrsimdê, Newroz, Zengerîyê, Bonê Pîyê Tîyo, Dewa Muqufî, Cengîyê û Kalîyê, Pîrê Xanûkano, Xanê Xanê, Axzonîgê, Heyî Heyî, Lîlo, Hemilkano.
Ozan Serdarî derheqê albumê xo yê dîjîtalî de wina vat: ”Ma 3 serrî verî dest pê na xebate kerd. La ma prosesê janî ra nêeşkayê CD vejê. Coka mi waşt wa deyîrî platformanê dîjîtalan de pare bibê. No seba mi zî çîyêko newe yo.”
Ozan Serdar serra 1954 de dewa Garmutî ya Dêrsimî de dadîya xo ra bîyo û o tornê dengbêjê namdarî yê binameyê Heso Qaydî yo. Heso Qeyd Terteleyê Dêrsimî ra verî 1935-36 de şîyo heqîya xo.
Ozan Serdarî qala deyîra bi nameyê ‘Xezale’ kerde û da zanayene ke o nika na deyîre ser o xebitîyeno. Serdarî vat: ”Na deyîre sey destanê Mem û Zîne derg o. Kalikê mi bi roja na deyîre vata. Kalikê mi û Zelale zerrî kewtbî pê. Kalikê mi rojêke veyveyêk de kilama Xezale vano û a şewe tay kesî Xezale remnenê. Kalikê mi a roje ra pey şoro kamca kilama Xezale vano û tira tay çîyan îlawe keno. Bi nê hawayî kilame vera bena dergêr.”
Ozan Serdar ê hunermendan ra yo ke reya verêne bi kirdkî album veto. Ozan Serdar 1980 ra nata Almanya de ciwîyeno. Albumê Ozan Serdarî nê yê: Mîro, Berxwedan, Îsyan, Welat, Koyu Mizûrî, Cenet Dêrsîmo, Da Da Alî û Xilweso, Wurze, Vilike, Dêrsim Klasikleri ve Zerya.
Şima eşkenê pê nê lînkî xo biresnê albumê neweyî yê Ozan Serdarî:
https://www.youtube.com/c/ArtRecords/search?query=Ozan%20serdar
