Xebatkarêko ke nêwaşt nameyê xo eşkera bikero rojnameyê Welatî rê qisey kerd û pare kerd ke mabênê Dêrê Katolîkî û Mescîdê Hasirliyî de 5ê sibate de ‘cenazayêka ke pê kincê sipîyî pêşîyaya ameye dîyene.
Xebatkarê şîrketî da zanayêne ke polîsan cenaza berde, herême girewte binê ablûqa û venga tîmanê Dezgehê Tipê Edlîyî da. Goreyê texmînan no kes wextê xoverdayîşê xoîdarekerdişî yê 2015î de hetê dewleta tirke ra ame qetilkerdene.
Nasnameyê cenaza hema nêame tesbîtkerdene. La 22ê çeleyê 2016î de Hakan Arslanî xoverdayîşê Sûrî de şehîd bi û cenazaya ci binê camîyê Hasirliyî de ameye definkerdene. Goreyê texmînan cenaza aîda ey a. Keyeyê Arslanî 5 serrî yo gêreno cenazaya lajê xo. Keye bi desan reyan amebi Amed, muracatê selahîyetdaran kerd. La muracatê înan nêameyî qebulkerdene. AMED
