HDP’ê bernameya têkoşîna serdema nû bi kampanyaya ‘Destpêkê Edalet’ li otelek Enqereyê da destpêkirin. Hevserokên HDP’ê Pervîn Bûldan û Mîthat Sancar, nûnerên rêxistinên civakî û demokratîk ên sivîl û gelek kesayetên tên nasîn beşdarî bernameyê bûn.
Bernameyê bi rêzgirtina ji bo kesên di têkoşîna demokrasî û azadiyê de jiyana xwe ji dest dane dest pê kir. Cîgirê hevserokên HDP’ê ji Rêveberiyên Xwecihî Berpirsiyar Salîm Kaplan û Endama Desteya Rêveberiya Navendî (MYK) HDP’ê Îlknûr Bîrol axaftinên destpêkê kirin.
Kaplan û Bîrol bi van gotinan kampanyayê dan ragihandin: “Ji me re ne bi gotinan, ne bi qencî, edaleta rastî lazim e.”
Nivîskar, rewşenbîr û siyasetmedar peyam şandin
Peyamên bi vîdeoyê ji aliyê nivîskar, rewşenbîr û siyasetmedaran ve bo bernameyê hatin şandin bi sînevzizyonê hatin nîşandan. Hevberdevkê HDK’ê yê berê Prof. Dr. Onûr Hamzaoglû, wezîrê berê Ziya Halîs, siyasetmedar û nivîskarê kurd Tarik Ziya Ekîncî, nivîskar Dogû Ergîl, siyasetmedar Nesrîn Nas, serokê rûmetê yê HDP’ê Ertûgrûl Kurkçu di vîdeoyên şandin de peyamên girîng ji bo têkoşîna azadî, edalet, aştî û demokrasiyê dan.
Peyamên Demîrtaş û Yuksekdag hatin xwendin
Peyamên hevserokên HDP’ê yên berê Selahattîn Demîrtaş û Fîgen Yuksekdag ên niha girtî ne jî ku ji bo bernameyê şandin hatin xwendin û di peyamên xwe de behsa edaletê kirin û xwestin destpêkê de edalet pêk were.
Yekitiya Ji Bo Demokrasiyê (DÎB) jî payem şand bernameya HDP’ê û peyama bi hêviya hemû bi hev re têkoşînê mezin bikin dan. DÎB’ê destnîşan kir ku daxuyaniyên reformê û destûra bingehîn a nû ji bo wan tiştek tune ye. DÎB xwest bi milyonan kes ji bo edalet û wekheviyê, azadiyê, demokrasiyê û aştiyê werin kêleka hev û ev kampanya HDP’ê ji bo edaletê destpêkek e û her wiha di peyama xwe ji bo HDP’ê û di xebatên wan de serkeftin daxwaz kir. ENQERE
