Partîya Demokratîke ya Şaran (HDP) çarçewaya Kampanyaya ‘Semedê her kesî edalat’î de zîyaretkerdişê partîyanê muxalîfan rê dewam keno. Badê CHP û Partîya Saadetî (SP) ewro zî partîya Deva ameye zîyertkerdene.
Hemsereka Pêroyî ya HDPyî Pervîne Buldan pîya bi heyetêk Serekê Pêroyî yê DEVA Ali Babacanî reyde ameyî têhet. Pêvînayîşo ke problemê bingeyî yê welatî tede ameyî qiseykerdene saetêk kerd derg.
Badê pêvînayîşê Buldana persê rojnamegêran cewab kerdî vat: ”Sey pêvînayîşanê ma yê partîyanê muxalefetî yê bînan ewro zî ma meseleyê bingeyî yê welatî girewtî dest. Ma ard ziwan ke yewbîyayîşê muxalefetî û îtîfaqê demokrasîyî hewce keno. Ganî îtîfaqê demokrasîyî heta vîjnayîşî sey demê ravêrtişî pakkerdişê rayîrî bikero. Sereyê nê meseleyan de hukmkerdişo edîl ca geno. Nika bi hezaran kesî bîlasebeb zîndanan de yê. Welato ke pê KHKyan yeno îdarekerdene de şar do senî tengayî ra bêro xelisnayene ma nayî ser o qisey kerd. Reyna ma qeyûmî ser qisey kerd ke hînî heme welatî ra vila bîyo. Îtîfaqê vîjnayîşî rojdemê ma de nîyo la ma derheqê asayîşê vîjnayîşî de qisey kerd. Meseleya qanûno bingeyî de sey HDPyî tewirê ma eşkera yo. Ma nêwezanê hukmat xo ser qerar bigîro, ganî fikrê muxalefet, dezgehanê komelê sîvîlî û heme hetanê komelî bêro girewtene.”
Buldane vat ê do 17ê sibate de Partîya Gelecekî de reyde pêvînayîş bikerê û Partîya Îyî ra zî randevu bigerê.
