Artêşa tirke herêma Garê ya Başûrê Kurdîstanî de 10ê sibate de pê nameyê “Pençe Kartal-2 Harekati” hêrişê îşxalî dayî destpêkerdene. Dima ke 8ê sibate de Serekkomarê Tirkîya Erdoganî vat ”Roja çarşemeyî ma do mujdeyêke bidê” operasyon dest pêkerd.
Hedefê hêrişan de herêma Garê estbî ke tede kampa esîran estbî. Nê esîrî polîs, leşker û endamê MÎTî bîyî. Merkezê Îrtîbatî û Çapemenîye yê HPGyî 11ê sibate de da zanayene ke artêşa tirke hêrişê kampe kerda.
Wezaretê Pawitişî yê Tirkîya 12ê sibate de pê eşkerayîyêke vat: ”Operasyon goreyê plansazîye şino.” Ewro Wezîrê Pawitişî Hulusî Akarî zî vejîya kamerayan ver û verî ke nameyanê esîran bido vat: ”Cenazayê 13 hemwelatîyanê ma yê sivîlan dîyayî. Nînan ra yew milê xo ra û 12ê ci zî sereyê xo ra pê guleyan ameyî şehîdkerdene.”
La nê esîrî 2015î ra nata destê HPGyî de bîyî û zerarêk nêresabi înan. Serranê vîyarteyan de PKKyî xeylêk esîrî zî vengdayîşê Meclîsî, dezgehanê heqanê merdiman ser o verdabî.
Goreyê doneyanê Şubeyê Amedî yê ÎHDyî de mabênê serranê 1990 û 2012an de 110 çalakîyanê cîyayan de 67 polîs, 32 qoricîyî, 145 karmendê dewlete, 15 sîyasetmedarî, 38 turîstî, 2 rojnamegerî û 36 sivîlî bi temamî 335 kesî ameyî esîrgirewtene. La nê merdimî vengdayîşan ra dima vera dîyabî.
Çalakîyanê esîrgirewtişî yê serranê 1990an ra tayî wina yê:
-Qezaya Şemzînanî ya Colemêrgî de çalakîya 5ê tebaxa 1991î ya vera qereqolê Samanli de 7 leşkerî ameyî tepiştene. Leşkerî 18ê teşrîna verêne ya 1991î de Zagros de komêka rojnamegeran rê ameyî teslîmkerdene.
-Leşker Nurettîn Demîr tebaxa 1991î e hêrişanê îşxalî yê vera Başûrê Kurdîstanî de tepişîya û leşkeranê qereqolê Samanli reyde vera dîya.
-Qezaya Motkî ya Bedlîsî de 16ê êlula 1991î de payeberzêk û 3 qoricîyî, 25ê teşrîna verêne ya 1991î de 3 leşkerê Colemêrgî, 27ê teşrîna verêne ya 1991î de leşkerêkê Berwarî, 20ê teşrîna peyêne ya 1991î de reyna Şirnex de payeberzêk, 25ê kanûna 1991î de Cûdî de tegmenêk tepişîyayî. Nê kesî 20ê nîsana 1992î de temsîlkaranê Xaçê Sûrî û rojnamegeran rê ameyî teslîmkerdene.
-Serra 1992î de payeberzêk, 2 leşkerî, malayêk rayîrê Wan-Bedlîsî de tepişîyayî û dima teslîmê keyeyanê înan ameyî kerdene.
-2ê kanûna 1992î de 3 leşkerî Amed de tepişîyayî û çend mengan ra dima rojnamegeran rê ameyî teslîmkerdene.
-18ê tebaxa 1993î de qezaya Hezroyî ya Êlihî e 13 leşkerî tepişîyayî û dima keyeyanê înan rê ameyî teslîmkerdene.
-Êlula 1994î de Şirnex de tegmen Mustafa Ozulker sey birîndar tepişîya, kampanê PKKyî de ame dermankerdene û erşawîya Hollanda.
-Kanûna 1994î de Şemzînan de leşker Îbrahîm Yaylali, 14ê hezîrana 1995î de 5 leşkerê bînî tepişîyayî û nê leşkerî tebaxa 1996î de vera dîyayî.
-8ê tebaxa 1996î de komêka leşkeran kampa Zelê de heyetê ÎHD û MAZLUMDERî rê ameye teslîmkerdene.
-Îbrahîm Yaylali dima ke vera dîya ‘propagandaya rêxistine’ ra erzîya zîndan.
-Serra 1996î e leşker Alaattîn Surer Wan de tepişîya û dima vera dîya.
-Teşrîna verêne ya 1999î e Colemêrg de 6 qoricîyî tepişîyayî û 11ê kanûna 1999î de vera dîyayî.
-18ê tebaxa 2005î de leşker Coşkun Kirandi Erzîngan de tepişîya û 4ê tebxa 2005î de Dêrsim de teslîmê heyetêkê sivîlî ame kerdene. Heyet de Temsîlkarê ÎHDyî Nîhdî Perînçek, Serekê ÎHDyî yê ê çaxî yê Amedî Selahattîn Demîrtaş, hunermend Ferhat Tunç û rojnamegerî estbî. Derheqê nê kesan de dima bi îdîaya ‘propaganaya rêxistine’ dewa ameye akerdene.
-3 leşkerê payeberzî û xebatkarêkê weşîye rayîrê Amed-Çewlîgî de 9ê temmuza 2011î de tepişîyayî û 16ê êlula 2011î de vera dîyayî.
-Qeymeqam Kenan Erenoglu û leşker Aykut Çelîk 12ê tebaxa 2011î de Amed de tepişîyayî û 19ê êlula 2011î de vera dîyayî.
-8 kesê bînî zî 2013 de vengdayîşê Rayberê Şarê Kurdî Abdullah Ocalanî ser o vera dîyayî.
22ê teşrîna verêne ya 2007î de qezaya Geverî ya Colemêrgî de 8 leşkerî çalakîya Orêmarî de ameyî esîrgirewtene. 4ê teşrîna peyêne de nê leşkerî heyetêkê sîyasetmedar û rêxistinanê komelê sivîlî rê ameyî teslîmkerdene.
Leşkerî dima maruzê tehqîqatî bîyî. Serekê verênî yê Meclîsî Mehmet Alî Şahînî seba esîran vatbi: ”Werrekna bimerdêne.”
