Şevê din li dijî hêzên hevpeymaniya navneteweyî ya bi pêşengiya Amerîkayê li Hewlêrê êrîşek bi mûşek pêk hat. Li gorî têgotin, zêdeyî 10 mûşek hatine avêtin, 8 teqîyane, 2 mûşek ji aliyê hêzên hevpeymanî ve li hewa hatine bêbandorkirin. Ji van 2 mûşek li Balafirgeha Navneteweyî ya Hewlêrê, hinek li konsolosxaneya Amerîka, 3 mûşek jî taxa Wezîran ketiye.
Li gorî daxuyaniya Hevpeymaniya Navneteweyî ya bi pêşengiya Amerîkayê taşeronek amerîkî ku li gel hêzên wan bûye hatiye kuştin û 6 taşeron jî birîndar bûne.
Lê Wezareta Derve ya Amerîkayê jî ragihandiye, taşeronek sivîl hatiye kuştin, çend endamên hevpeymanî, leşkerekî amerîkî û çend taşeron jî birîndar bûne.
Wezareta Tendûristiyê ya Herêma Federal a Kurdistanê jî amareke cûda da û diyar kir 3 kes birîndar bûne, yek ji wan nobedarê konsolosxaneyê bûye.
Ji daxuyaniya hevpeymaniyê û Amerîkayê tê fêmkirin, hêzên Amerîka yên li Hewlêrê hatine hedefkirin û dibe mûşek arasteyê baregeheke wan a leşkerî hatibe kirin.
Piştî êrîşê şevê din liv û tevgera balafirên Amerîkayê li ser ezmanê Hewlêrê çêbû.
Serokê Hikûmeta Herêma Federal a Kurdistanê diyar kir ku wan ji bo tespîtkirina berpirsên êrîşa şevê din, bi hemahengiya hêzên federal ên Iraqê re lêpirsîn û lêkolîn dane destpêkirin.
Li gorî hêzên dijî teror a başûrê Kurdistanê jî wesayîtek ku tê îdîakirin a êrîşkarane îmhakirine, lê nayê zanîn xwediyê vê wesayîta êrîş pê hatiye kirin kî ye? HEWLÊR
