Artêşa tirke ya îşxalere vera warê Garê operasyonêk kerdbi û operasyon de 13 polîs, leşker û endamê MÎTî yê ke destê PKKyî de bîyî merdî. Komeleya Heqê Merdiman (ÎHD) derheqê mesele de kombîyayîşê çapemenîye kerd. Hemserekê ÎHDyî Ozturk Turkdogan û îdarekarê ÎHDyî beşdarê kombîyayîşî bîyî.
Turkdoganî da zanayene ke 13 kesî 6 serrî yo destê PKK-HPGyî de bîyî û vat: ”Keyeyanê nê kesan verî muracatê ma kerd, ma zî selahîyetdaran û Meclîsî reyde derheqê înan de qisey kerd. Keyeyan zî wezîr, serekwezîr û serekomarî reyde pêvînayîşî kerdî û waşt ke wa mesele rê çareserîyêk bêra dîyene. ÎHDyî nê pêvînayîşan de keyeyan rê vat ke eşkeno berpirsîyarî bigêro milê xo. Rixmê hende xîretan zî çîyêk nêame kerdene û netîce resaye nê rojan.Seba asayîşê nê kesan tedbîrêk nêame girewtene. Artêşa tirke vera warêkê birîskî operasyonêk kerd. Coka ê mesuldarê na netîce yê. Ma wazenê cigêrayîşêko bitesîr wa bêro kerdene û ma eşkenê na babete de mesuldarî bigêrê. ” ANQARA
