Hemserekê Partîya Demokratîke ya Şaran (HDP) Mîthat Sancarî kombîyayîşê partî de hêrişê îşxalî yê vera Garê ercnayî ke netîceya ci de 13 endam, polîs û personelê MÎTî ameyî kiştene.
Qiseykerdişê Sancarî ra beşêk wina yo: ”Ganî eşkera bibo ke senî nê merdimî kişîyayî. Kamî kişto zî na rewşe qetî nêna qebulkerdene. Ma nê serebûtî şermezar kenê. Çira ma raştîyan wazenê? Çunke ma pê qiseyanê wezîran û hukmatî bêşert bawer nêkenê. Ma bala xo bidê tay mîsalan ser. Serra 1994î de netîceya bombardumanê teyarayanê şerî de Koçagali de 38 kesan dinyaya xo bedilnaye. Mîsalo bîn zî qirkerdişê Basa yo. Serra 1996î de qezaya Basa ya Şirnexî de 11 dewijî zereyê mînîbusêke de pê guleyî kişîyayî û dima zî ameyî vêşnayene. Reyna Qirkerdişê Roboskî de pê bombayanê teyarayanê şerî 34 merdimî ameyî qetilkerdene ke zafê înan doman bîyî.
Tewirê HDPyî eşkera yo. Ma nê serebûtî şermezar kenê. Rayîr û metodê eşkerakerdişê nê serebûtî kifş ê. Na babete û nê serebûtî ra têna îqtîdarê AKP-MHPyî mesuldar o.
Goreyê doneyanê Komeleya Heqê Merdiman (ÎHD) yê serranê 1990-2010î 335 kesî hetê PKKyî ra ameyî tepiştene û netîceya xîret û têkilîyan de nê kesî weş û war xelisîyayî.
Keyeyanê nê 13 kesan 2015,2016 û 2019 de partîya ma zîyaret kerde û ma keyeyan reyde kombîyayîşê çapemenîye kerd. Keyeyî tewr peyên resayî girê peyênî. O gir zî îqtîdar bi. La îqtîdarî derheqê na mesele de çîyêk nêkerd. Êyê ke meraq kenê wa biewnê mektubanê nê kesan ke îqtîdarî se kerdo se nêkerdo.
Îqtîdarî na mesele de mesuldarîyê xo nêardî ca. Nê qirkerdişî de mesuldarîya ci esta. Îqtîdar neçar o ke hesab bido. Ma nêwazenê polemîkan bikerê la îqtîdar nê serebûtî ra semed HDPyî sûcdar keno ke sûcê xo binimno. Îqtîdar operasyonêkê neweyî keno. Wa her kes bizano ke no operasyon vera hêvîya demokrasî û sîyasetê demokrasî yo. Şima se kenê wa bikerê nêeşkenê verê ma bigêrê. Ma bi qerardarî têkoşînê xo rê dewam kenê.” ANQARA
