Greva birçîbûnê ya dorveger û bêdem ku bi armanca azadiya Rêberê Gelê Kurd Abdullah Ocalan ji aliye girtiyên PKK û PAJK’ê ve hatiye destpêkirin, sê meh li pey xwe hişt.
Ji bo bal kişandina ser çalakiya greva birçîbûnê, li Parka Koşûyolû ya navçeya Rezanê ya Amedê her hefte daxuyanî tê dayîn. Çalakiya vê hefteyê bi pêşengiya Kongreya Îslamî ya Demokratîk (DÎK) pêk tê. Endamên Partiya Demokratîk a Gelan (HDP), Partiya Herêman a Demokratîk (DBP) û Tevgera Jinên Azad (TJA) piştgirî dan çalakiyê. Parlamentera HDP’ê ya Amedê Remziye Tosûn jî tev li çalakiyê bû.
Beriya ku daxuyanî bê dayîn, polîsên tirk bi gelek wesayitên zirxî û TOMA’yan dor li Parka Koşûyolû girtin. Kesên ku ji bo daxuyaniyê hatin parkê jî di nava dorpêçiya polîsan de man. Ji ber ku polîsan destûr nedan daxuyanî bê dayîn, girseya gel bi du koman li qadê dest bi çalakiya rûniştinê ya nîv saetê kirin.
Piştî çalakiyê girseya gel ji qadê belav bû. AMED
