Vervatoxa Meclîsê Cinîyan ê Partîya Demokratîke ya Şaran (HDP) Ayşe Acar Başarane derheqê rojdemê cinîyan û hêrişanê vera endamanê HDPyî de kombîyayîşêkê çapemenîye kerd. Kombîyayîş Merkezê Pêroyî yê HDPyî de ame kerdene û parlamenterê cinîyî zî tewrê ci bîyî.
Qiseykerdişê Başarane ra beşêk wina yo: ”Persê ‘Operasyon çira bîyo sebebê kişîyayîşan’ hema zî bêcewab o. Cewab nêame dayene. Kesê ke ganî hesab bidê ameyî Meclîs û seba ke binkewtiş, şaşîyanê xo mîyan bikerê hêrişê muxalefet, partîya ma û cinîyan kerd. Wezîrê Karanê Zereyî Suleyman soyluyî cewab nêda persan.
Soylu pê vatişê ‘wekîlêke şîya Garê’ zûr kerd. Fotografê wextê prosesê çareserîye yê Taşdemîre pare kerdî. Derheqê hemsereka ma û wekîle Taşdemîre de lînç da destpêkerdene û nê hêrişî dewam jerdî. Garê de se bîyo ey hema zî cewab nêda.
Îqtîdar operasyonê Garê ser ra cinîyan keno hedef. Îqtîdarî sîyasetê şerî reyde tim cinîyî kerdî hedef. Îqtîdar wazeno ma sereyê co bîyarê war la ma do têkoşînê xo dewam bikerê.Têna cinîyê HDPyîjî nê ganî pêro cinîyê azadîwaştoxî vera nê sîstemê mîlîtarîstî vengê xo berz bikerê.
8ê Adare bena nêzdî. Ma hetêkî ra Kampanyaya ‘Semedê Her kesî Edalet’ anê ca hetêkê bînî ra zî agêrenê meydanan. Îqtîdar nêeşkno têkoşînê cinîyan hukm bikero. Pê şîarê ‘Pê xoverdayoxîye cinîyî şinê ver bi azadîye’ ma do her ca têgêrayîşê cinîyan reyde bibê. Ma edaletê camêrdan nêwazenê. Ma venga serekê şerî, Wezîrê Karanê Zereyî danê ke ma sey to zaf merdimî dîyî ê zî ser nêkewtî ti zî do ser nêkewe.” ANQARA
