Navenda Nûçeyan
Kongreya Demokratîk a Gelan (HDK) bi civîneke çapemeniyê têkildarî pîrozbahiyên Newroza îsal ku wê li 30 bajar û 61 navenda bên kirin, deklerasyonek aşkera kir. Hevberdevkên HDK’ê Îdîl Ûgûrlû û Sedat Şenoglû, nûnerên partî û rêxistinên pêkhateyên kongreye û parlamenterên HDP’ê tevlî civînê bûn. Li eywana ku civîn lê hat lidarxistin, pankartên “Em bi agirê Newrozê li ber xwe bidin û bi serkevin” û “Wê jin bi serhildana xwe agirê Newrozê geş bikin” hatin daleqandin.
‘Adarê zindîbûn û nûkirina xweza û xwebûnê ye’
Deklerasyona ku hatibû amadekirin Hevberdevka HDK’ê Îdîl Ûgûrlû aşkera kir. Ûgûrlû, diyar kir ku weke HDK’ê ji ber navbeynkariya xwe banga ku wan aniye cem kêfxweş in û wiha got: “Tişta ku em navbeykariya wê dikin sekna hişmendî û feraseta peywirê ku ji berpirsyarî û pewîstiyên demê ne. Banga ku me tîne cem hev Newroz û mêjî û wêrekiya wê ye. Newroz me hemûyan dike yek. 21’ê Adarê zindîbûn û nûkirina xweza û xwebûnê ye. Ji ber vê dawiya her zivistanî bihar e. Ji ber vê jî gel Newrozê weke hezkirin, kêf û xweşiyê dijîn û pîroz dikin.”
Ûgûrlû di berdewamê axavtina xwe de ev tişt anîn ziman: “Newroz kêfxweşiya rizgariya civakî, piştevanî û yekitiyê ye. Ji ber vê jî dawiya tariyê ronahî ye. Dawiya desthilatên zalim hilweşandin e. Dawiya pergalên zilmê azadî ye. Wê îsal jî cejna qedîm a kurdan Newroz bi coşeke mezin bê pîrozkirin. Wê bi agirê Newrozê hêzen edalet, wekhevî, rûmet û aştiyê li dijî zordariya faşîst bibin yek. Di serî de Zindana Îmraliyê wê zilma tecrîdê ya li civakê berbelav bûye bişikîne. Wê ji bo vîna yekbûyî ya gelê me, demokrasî û azadiyê bibe serdemeke nû. Dawiya zordaran nêz e. Mizginiya Newroz 2021’an ev e.”
Banga Newrozê
Ûgûrlû, gotinên xwe bi van bangên Newrozê bi dawî kir: “Em bang li hemû hêzên ked û demokrasiye, hemû beşên civakê yên têkoşîna heq, hiqûq, edaletê didin dikin ku em li qadên Newrozê bên gel hev. Newroz pîroz be!”
