Navenda Nûçeyan |
Meclisa Giştî ya Partiya Yekitiya Demokrat (PYD) têkildarî hewldan dagirkirina Şengalê û zextên hikûmeta navendî ya Iraqê daxuyaniyeke nivîskî parve kir û berxwedana şengaliyan silav kir.
Daxuyaniya PYD’ê ya derbarê mijarê de wiha ye:
“Di destpêkê de, em berxwedana gelê xwe yê Şengalê û sekna wan a li pêşberî binpêkirinên nedemokratî yên hikûmeta Iraqê ya li hemberî Rêveberiya Xweser a Şengalê û saziyên wê, silav dikin. Şêniyên Şengalê bi dehan caran rastî qirkirinê hatine, ji encama tunebûna hêza xwe ya taybet a parastinê û komkujiya di 3’ê Tebaxa 2014’an de ji hêla DAIŞ’ê ve hatine kirin, mînaka herî şênber a vê rastiyê ye.
Hêzên Ewlekariya Hundurîn û Hêzên YBŞ’ê nûnertiya vîna gelê me yên Şengalê dikin û ew di heman demê de misogerên ji bo astegkirina komkujiyên nû derheqê wan in. Ew beşek ji sîstema parastinê ya Iraqê ne, ne dijî Iraqê ne. Berovajî vê yeke modela Rêveberiya Xweser a Şengalê mifteya çareserkirina hemû pirsgirêkên li Iraqê ne, ew modeleke demokratîk û alternatîf e.
Em wekî Partiya Yekitiya Demokratîk (PYD), bang li hikûmeta Iraqê dikin ku li şûna zimanê zext û tehdîdê zimanê diyalogê bipejirîne û taybetmendiya vê herêmê ber çavan were girtin. Em di heman demê de piştrast dikin ku em li gel gelê xwe yê Şengalê ne û piştgiriya wan dikin, ji ber ku doza xweparastinê mafek rewa û pêdivî ye.”
Hêjayê bibîrxistinê ye di 9’ê Cotmeha 2020’î de li ser daxwaza dewleta tirk a dagirker, di navbera hikûmeta navendî ya Iraqê û PDK’ê de bêyî ku îradeya gelê Şengalê bê naskirin, Peymana Şengalê hatibû îmzekirin. Gelê Şengalê jî ji bo parastina axa xwe û piştgirîdayîna Asayîşa Êzidxanê zêdetirîn 100 roj in di çalakiyê de ne.
