Qezaya Pirsûsî ya Riha de wextê weçînayîşanê 2018î de 24ê hezîrane de pawitoxanê Wekîlê AKPyî Îbrahîm Halîl Yildizî û merdimanê ci hêrişê keyeyê Şenyaşarî kerd. Emîne Şenyaşara ke 2 lajê ci û mêrdeyê ci hetê pawitox û merdimanê Wekîlê AKPyî Halîl Îbrahîm Yildizî ra kişîyayî, lajê xo Ferît Şenyaşar reyde 7 rojî yo verê edlîyeyê Riha de pê waştişê edaletî çalakîya roniştişî kena. Emîne Şenyaşara ewro wexto ke verê edlîyeyê Riha de çalakîya roniştişî kerdêne hetê polîsanê tirkan ra ameye destbendkerdene.
Keyeyî waşt ke Serdozgerîya Komare reyde ronişo la waştişê ci nêame caardene.
Keyeyê Şenyaşarî twitter de vat: ”Nobeta ma ya edaletî roja 7. de dewam kena. Ma venga pêro wayîranê wijdanî danê ke wa bêrê verê mehkeme de 10 deqayan paştî bidê ma.” RIHA
