Avûkatanê Rayberê Şarê Kurdî Abdullah Ocalanî Faîk Ozgur Erol, Rezan Sarica, Cengîz Yureklî û Serbay Kokluyî derheqê îdîayanê serê weşîya Rayberê Şarê Kurdî de Serdozgerîya Komare ya Bursa rê muracat kerd. Avûkatan seba tepişteyanê bînan ê Îmraliyî Omer Hayrî Konar, Veysî aktaş û Hamîlî Yildirimî zî muracat kerd.
Wasîyê Rayberê Şarê Kurdî Mazlûm Dînç û birayê Rayberê Şarê Kurdî Mehmet Ocalanî, keyeyanê Îmraliyî Omer Hayrî Konar, Veysî aktaş û Hamîlî Yildirimî zî seba pêvînayîşî muracat kerd.
Keye, wasî û avûkatanê Rayberê Şarê Kurdî Abdullah Ocalanî pê waştişê ‘ muracatê lezabezî’ Serdozgerîya Komare ya Bursa rê reyna muracat kerd û waşt ke muracatê înan wa cade bêro qebulkerdene.
Waştişnameyê muracatî de ame vatene ke Rayberê Şarê Kurdî Abdullah Ocalanî tewr peyêne 3ê adara 2020î de avûkatanê xo reyde û 27ê nîsana 2020î de zî telefon de keyeyê xo reyde pêvînayîş kerd. Avûkatan pare kerd ke pêro muracatê înan ê seba pêvînayîşî ameyî redkerdene û astengkerdene.
Waştişname de wina ame vatene: ”Şertê girawa Îmraliyî, kerdişê tecrîdî û tepiştîtîya bi serran têgêrayîşê sîstematîk ê û dûştê qedexeyê îşkenceyî yê. Rixmo ke CPTyî raporanê xo de no ard ziwan qet yew holîkerdiş nêame caardene.
14ê adara 2021î de tay sîteyan de û medyaya komelkî de derheqê weşîya muwekîlê ma de îdîayê cidîyî ameyî vilakerdene. Seba ke qesaweto ke nê îdîayan ra semed qewimîya bêro rehetkerdene ganî ma cade muwekîlê xo reyde pêvînayîş bikerê.” STENBOL
