Amedijan rayna Nawroza 2021î de yew tarîx nuşt. Amedijan; roja Newroze, bi cilanê xo yê renginan, bi alanê kesk û sûre û zerdan, bi dîlan û govendanê xo, bi tilêlîyan û deyîranê xo, bi dawûlan, bi saz û sazbendanê xo, bi sloganê xo meydanê Newroze kerd se şahîya serehewanayîşî. Bi taybetî Ciwanan û cinîyanê Amedî damxaya xo dayî na Newroza 2021î ro. Newroze û Amedijan adeta no tablo de yewnan temam kerdî. Şarê Amedî, esla zilm rê sereyê xo nêronano. Amedijan vera zilm û zorî de no Roşano pîl de, bi vindertişê xo vat ke; “Ma ewta de yê, yewer nişno ma û îradeyê ma teslîm bigêro.”
Şahîya Newroze, verê Namebê Komîteyê Tertîbî Îrfan Sonerî vat ke; “Zorê Dehaqî, bi serehewanayîşê Kawayî şi û adirê Newroze tavist. 2633 serrî yo ke Roşanê Newroze pîroz beno. Newroz serehewanayîş a, Newroz seyyewbînaneyî ya, Newroz edalet û demokrasî ya. Ma bi eşqê Mem û Zîne Newroze pîroz kenê.”
Dima adirê Newroze ame tavistiş. Dima Wekîla Amedî Semra Guzele, vat ke; “Meydanê Newroze meydanê serehewanayîşî yo. Ayê ke kurdan çinbîyaye hesibnenê wa nê meydan ra biewnê. Îqtîdar; peymana Îstanbulî ya ke heqanê cinîyan pawena ra qerfîyaya. Îqtîdar wazeno ke, têkoşîna ma yê cinîyan berteraf biko. Ma nê qerarê înan nêreşnenê/nêşinasnenê. Ma estê û ma ê xo benê. Hemserekîye, xeta ma ya sûre ya.”
Dima zî Serekê Partîya Komînîste Sînan Çîft Yurekî, mesajê xo de vat ke, semedo ke ziwanê maye bibo ziwanê perwerdeyî, kampanyaya îmzeyî rê destek bidê. Dima zî vat ke; “hinê wext wextê yewbîyayîşê kurdan o. Eke ma yew bibî, serkewtiş nizdî yo.”
Hemserekê HDPyî Mîthat Sancarî zî Newroza Amedî de, verê Selahattîn Demîrtaş, Fîgen Yuksekdag, Selçûk Mizrakli, Gulten Kişanak, Leyla Guven, Musa Farîsoglû tede heme tewişteyanê/tepişteyanê sîyasîyanê rê selamî raykerdê. Omer Farûk Gergerlîoglu rê mesajê destekî û selamî raykerdê.
Mîthat Sancarî, wina dewam kerd; “Newroze nameyê serehewanyîşî ya. Hetan no şar ewta de bo, hetan adirê Newroze veşeno, yewer nişno sereyê ma bido derenayîş, nişno ma bido çokdayîş. Bi mîlyonan şar meydananê Newroze de vano ke; “Ma vera şima sereyê xo deranînenê, ma soz danê ke, ma têreyde nê welatî rê azadî anê, demokrasî û aşîtî anê. Bi sîyasetê nişnê zorê HDP berê, na ray bi dozgerê xo dekewtê hereket. Wazenê ke bi dozgerî, HDP bidê qefilnayîş. Şima HDP bidê qefilnayîş, şima nê şarî sekenê? Şima nê şarê dekenê kura? Ma têkoşîna demokrasî de israr kenê. Gelo HDP yew dikan o ke şima padanê? HDP şar o, şar. HDP adreseya hîvî yo, HDP no welat de emnîyetê azadî mîyan de û aşîtî mîyan de ciwîyayîşê şaran o. Ma bi hêzê şarê xo rayîranê neweyan akenê. Ma hanîyê ewta de yê, wa şima rê dert bo, dert beno şima rê, şima vînî kenê, vînê kenê. HDP no welatî rê azadî ano, demokrasî û aşîtî ano. Şima heme rayîrê xo ceribnayê, şima hinê qedîyayê. Şima zîndanan reyde, nişnê ma biedilnê. Dozgerê şima nişnê ma biedilnê. Hileyê şima nişnê ma biedilnê. Çunku ma, şarê ma yo ke serehewanayo, ma hîvîya nê şarî yê. Ma ewta ra vengda heme şaran danê ke hedef tena HDP nîyo, hedef qedinayîşê hîvîya demkrasî yo, hedef qedinayîşê ferasetê azadî yo. Hedef hîvîya pîya cîwîyayîşê şaran o. Bêrê ma pîya têkoşîn bidê. Ma pîya demokrasî û azadî bîyarê. No îqtîdar ma ra terseno, çunku ma bi hêz ê.”
Mîthat Sancarî wina dewam kerd; “Semedo ke meseleya kurdan bi diyalog û muzakereyan çareser biba, Newroza 2013î de Mektuba Ocalanê wanîya. Talebê ke no mektube de ca gênê, ma peydê nê taleban de yî. Şer de israr, bêçareyeyî de israr o. Hepsîyê Zîndanî, semedo ke ke Ocalanî ser ra tecrîd hewanîyo û berê aşîtî û çareserî biabo, 115 rojî yo dest bi grevê veyşaneye kerdî. No îqtîdar wazeno ke sîyasetê demokratîkî dewre ra vejo. No îqtîdarî ra ma aşîtî nêwazenê. Ma aşîtî; hêzanê demokrasî ra wazenê. Ma aşîtî û demokrasî, ancax bi şaranê tirkîya anê. Bêrê ma pêya aşîtî û demokrasî bîyarê. Aşîtîya Rojhilatê Mîyanênê, çareserkerdişê meseleya kurdan ra vêrena. Xelisîyayîşê kurdan, yewbîyayîşê kurdan ra vêreno. Newroze, sembolê yewbîyayîşî ya. Heme kurdî wa no sembolî rê wayîr vejîyê.
Meydanê Newroze ra mesajê Amedijan zelal o. Newroza Amedî de nê hîrê mesajî vejîyayê. Vera padayîşê HDPyî yew mesajo edetî dîyayo. Amedijan vat ke; “Şima nişnê partîya şarî biqefilnê.” Ay dîyin no şar bi vindertişê xo vano ke; “Fek polîtîkaya înkar û îmhayî ra veradê. Çunku na polîtîkaya şima îflas kerda.” Ay hîrêyin zî no şar vano ke; “Şima temsîlkaranê ma dekê zîndanan zî, şima bi zîndanan, nişnê ma û temsîlkaranê ma cê ra biqerifnê.
