Semedo ke HDP bêro qefilnayîş, Serekdozgerê Yargitayî Bekîr Şahînî, yew dosya raykerdbî Mehkemeya Qanûnê Bingeyî. Semedo ke Mehkemeya Qanûnê Bingeyî dosyaya qefilnayîşê HDPyî tepa raykerda, Dewlet Bahçelî vat ke; “Qefilnayîşê Mehkemeya Qanûnê Bingeyî, nîno taloqkerdiş.” Aseno ke qeraranê Mehkemeya Bingeyî zî qebul nêkenê. Vejîya orte ke, îdeanameyê qefilnayîşê HDPyî Merkezê MHPyî de hadre bîyo. Rayna vejîya meydan ke HDP tena sîyaseto mûxalîf kerdo, dosyaya qefilnayîşî hadre bîya. No semed ra Mehkemeya Qanûnê Bingeyî na dosya tepa/tepîya raykerda.
Hinê Tirkîye de, Rejîmê Yew Merdimî de, qanûn-manûn nêmendo. No nîyet de bi temamî berterafkerdişê edaletî esto. Mehkemeya Qanûnê Bingeyî, derheqê Can Dundar û Erdem Gulî de, vernîya texlîye biabo, qerarê îxlalkerdişê heqî dabî. Na ser o Serekkomar Recep Tayyîp Erdoganî vat ke; “Ez nê qerarî nêşinasnena, nê qerarî rê rêz nêbena.” Wexto ke hesabê înan bêro, vanê ke; “Tirkîye de mehkemeyî bêteraf î, ma nişnê mudaxeleyê înan bikê. Wexto ke goreyê înan qerar nêdîyo, vanê ke; “Ma nê qerarî nêsinasnenê.”
Gureyê Meclîsê Tirkîye ra ay yewin; vetişê qanûnan o. Madem hinê Muqtedîrê îqtîdarê AKP/MHP qeraranê mehkemeyan zî nêgênê dîqet. No semed ra hinê fonksîyonê Meclîsê Tirkîya nêmaneno. Meclîs, sey noterê Rejîmê Yew Merdimî têgeyreno. Raşta ey, eke HDP bêro girewtiş, heq esto ke Meclîsê Tirkîye zî bêro padayîş. Çunku Meclîsê Tirkîye zî bêmûxalefet maneno. Demokrasî, heq, huqûq nêmaneno. Eke HDP bêro padayîş, hinê Rejîmê Yew Merdimî bi temamî hakim beno û Tirkîye de sîyaseto demokratîk dewre ra vejîno.
Wekîlê HDPyî Omer Farûk Gergerlîoglû wekîlêy ra hame girewtiş. Na ser o Gergerlîoglû tede wekîlanê HDPyî Meclîs de “Nobeta Edletî” tewîştê/tepîştî. Gergerlîoglû, Meclîs de serê sibay wexto ke abdestxane de destmaj gêno, pîjamanan ra yeno tewiştiş. Emnîyet de îfade ey gênê dima yeno veradayîş.
Polîsan vist keyeyê Omer Farûk Gergerlîoglû ser û bi derbkerdiş girewtî binê çiman. Semedo ke rewşa Gergerlîoglûyî baş nêbîya, hewanîyayo Nêweşxaneyê Bajarî yê Enqereyî. Gergerlîoglû no nêweşxane de anjiyo bîyo. Hima tedawîyê ey nêqedîyo bi lez û bez raykerdo hepisxaneyê Sîncanî. Hemserekê HDPyî Selahattîn Demîrtaş, Fîgen Yuksekdag tede wekîl û hemserekê şaredarîyan gure ra girîyayê û bêhuqûqey reyde debîyê hepisxaneyan. Nê merdiman tena sîyaseto demokratîk kerdo. Şima tehamulê sîyasetê demokratîkî nêkenê. Heme îdareker û karmendê Dewleta Tirkîya tede, heme hêzê asayîşê vergîyê şaran reyde miqat benê. Aye ra hêzê asayîş û karmendê dewlete vera nê temsîlkaran, ganî xesas têbigeyrî. Îşkence û heme tewir xeyrî însanî mûamele nîno qebulkerdiş.
Wazenê ke Partîya HDPyî biqefilnê, bi temamî vengê temsîlkaranê kurdan ê demokratan bibirnê. Aseno ke Îqtîdarê AKP/MHPyî tehamulê muxalefetî yê demokratîkî nêkeno. Bellî yo ke sîyaseten nişnê zorê HDPyî berê, na ray dozgeranê xo dekenê dewre. Dewlet Bahçelî vano ke “Wexto ke HDP bêro padayîş; ganî bi yewna nameyî nêro abeyîş” Na heme kes zano ke herinda HDPyî de, kam partî bidekewo weçînayîş, hina zaf rayan gêna. Aye ra beno ke nameyê partî bibedilîyo, la partîya nê şarê esla nêpadîna. Yanî partî qefilnayîş, çare nîyo.
Ewta de aseno ke, muqtedîrê Rejîmê Yew Merdimi; hinê wazenê ke, heme mehkemeyê Tirkîye îtaetê înan bikê. Hinê bi nê vatişanê xo wazenê ke mehkemeyê Tirkîye bi talîmatê înan têbigeyrê. Eke dozgerî yan dadgerê Tirkîye, bê zerba înan qerar bigêrê, nê dozgeran û dadgeran gênê hedef. Ya gure ra gênê, yan zî surgun kenê.
Sîyeset de bi zopeyê dozgeran Partî qefilnayîş meşrû nîyo. Sîyaseto Demokratîk de partîya sîyasî; weçînayîş de ancax bi rayanê şarî yena padayîş. Wa partî weçînayîşî reyde bêrê, wa weçînayîşî reyde şêrê. Yewna rayîr meşrû nîyo.
