Grevê vêşanîye yê tepişteyan ê vera tecrîdkerdişê Rayberê Şarê Kurdî Abdullah Ocalanî û binpaykerdişê heqan ê zîndanan roja 138. de dewam keno. Hemvervatoxa Komîsyonê Zîndanan ê Komeleya Huqûqnasanê seba Azadîye (OHD) Destîna Yildiz derheqê mesele de qisey kerd.
Destîna Yildiz da zanayene ke ê pê rayîrê muwekîlanê xo rewşa zîndanan teqîb kenê. Destîna Yildiz eşkera kerd ke semedê meseleyanê weşîyan grevê vêşanîye herinda 5 kesan de pê koma 2-3 kesan dewam keno. Destîna Yildiz ard ziwan ke heman tepişteyî vera tewrê grevê vêşanîye benê coka rewşa weşîye ya înan binê tesîrê xirabî de manena.
Destîna Yildiz bale ante ser ke pê bahaneya grevê vêşanîye tepişteyan rê cezaya dîsîplînî dîyena. Destîna vat: ”Waştişê tepişteyan meşrû û heq ê. Tepişteyî wazenê keye û avûkatî bi hawayêkê sîstematîkî û huqûqî şorê pêvînayîşê Îmraliyî. Waştişê tepişteyan pê pêvînayîşê telefonî yê 4 deqayan nêqedîyeno.”
Destîna pare kerd ke tepişteyî seba heqanê xo yê xozayîyan grevê vêşanîye kenê û no zî nîşaneya bêhuqûqî ya. Yildize vat: ”Wa sîyasetmedar û rêxistinê komelê sivîlî sebebê ney xo rê bipersê. Ganî sîyasetmedar, rêxistin û rayaumûmîye mesuldarîya xo bîyarê ca, seba naye xîret bikerê. No proses nedîyar o. Grevê vêşanîye nika bi hawayêkê dorî dewam keno la beno ke na rewşe vurîyena. Verî ke erey bo ganî seba caardişê waştişanê tepişteyan game bêra eştene.” STENBOL
