Kongreya Neteweyî ya Kurdistanê (KNK) û Komîteya Şar û Bawerîyan KCKyî bi eşkerayîyêke nuştekî Roşanê Çarşema Sûre ê pêroyê şarê êzidî, kurd û heme şaran bimbarek kerdî. KNK eşkerayîya xo de va: “Siba Çarşema Sûre, Çarşema serê Nîsane ya. Roşanê Çarşema Sûre semedê şarê êzidî wayîrê manayêka bawerî û tarîxî yo. Olê êzidîtî olanê tewr kehenan ra yo.”
”Ma Roşanê Çarşema Sore yê êzidîyan fîraz kenê. Ê kurdê ke na roje sey Çarşema Serê Nîsane fîraz kenê roşanê înan zî fîraz bo.
Şarê êzidîyan emser Çarşema Sore pê xoverdayîşî fîraz kenê. Êzidîyî goreyê çend serran verî zêdêr rêxistinkerde û hîşmend ê ke no zî destkewteyêko pîl o. Ma bi wesîleya na roje têkoşînê xoverdayîşî yê şarê êzidîyan ê seba Şingalî zî fîraz kenê û înan rê serkewtiş wazenê.
Êzidîyî seke pêro tarîx de bîyî hedefê dişmenanê kurdan de yê. Tarîx de zafêr dewleta tirke hemkar û bêbextanê kurdan reyde hêrişê êzidîyan kerd. Ewro zî dewleta tirke ya faşîste PDKyî reyde hêrişê êzidîyan kena. Dewleta tirke bi îdareyê AKP-MHPyî de seba armancanê emperyalan, PDK zî seba hemkarîya dewleta tirke ya faşîste êzidîyan rê dişmenîye kenê.
Êzidîyî rixmê hende hêriş û tedayan 6 serranê peyênan de zaf aver şîyî. Emser Çarşema Sore pê xoverdayîşî yena fîrazkerdene. Nê xoverdayîş, têkoşîn û rêxistinîye Roşanê Îmanî zî kerd manadar. Nê averşîyayîşî kenê ke êzidîyî xo newe ra bişinasê, biafernê û bi hawayêkê xoserî biciwîyê. Ganî no erj bêro fîrazkerdene.
Şarê ma yo ercîyaye;
Çarşema Sore her roje hîna zêdêr bena roşanê newera afernayîşî û xoverdayîşî. Goreyê bawerîya êzidîyan erdê Kurdîstanî welatê ‘Heqwarî’ yo. Êzidîyî perwerîya kurdan a seba erdê Kurdîstanî pê nê roşanî fîraz kenê ke no zaf ercîyaye yo. Ganî ma Çarşema Sore pê pawitişê kultur, bawerî û erdê xo, pê nêteriknayîş û agêrayîşê Kurdîstanî fîraz bikerê. Nê esasî ser o şexsê Mam Zekî Şingalî, Zerdeşt, Beşîr û Agît Civyanî de ma pêro şehîdanê çêranê ke seba pawitişê erdê ‘Heqwarî’ şehîd bîyî bi rêzdarî yad kenê.
Ma venga êzidîyan danê ke tehlukeyê qirkerdişî nêqedîyayo coka xopawitiş û rêxistinîya xo pîlêr bikerê. Bi wesîleya nê roşanî ma ancî girîngîya yewîya êzidîyan anê ziwan. Wa şarê Başûrê Kurdîstanî bizano ke eke xoserîya Şingalî bîyaro ca Başûrê Kurdîstan hîna beno demokratîk, edîl û wayîrê îdareyê durustî. Coka ma venga şarê Başûrê Kurdîstanî danê ke zêdêr wayîrê xoverdayîşê Şingalî vejîyo, tewrê nê xoverdayîşî bibo. No vengdayîşê ma seba hêzanê demokratîkan ê Iraqî yo zî.
Şarê ma yê êzidîyan o ercîyaye;
Ganî ma kulturê şarî xo ser o wayîrê yewbînan vejîyê û muhtacan rê hetkarîya madî û manewî bidê. Ma venga şarê xo yê Ewropa danê ke rayberîya nê paştdayîşî bikero. Kurdî şarêko nîyetpak, hol û ardimker o. Nê erjê ma yê exlaqî heqê zaf zehmetîyan ra ameyî. Eke ma nê erjanê xo pê hîşmendîya Apogîrîye rêxistinîya neteweya demokratîke reyde bikerê yew ma rê zorîye nêvirazîyena. Çarşema Sore nê kulturê ma pawena. Coka emser zêdêr goreyê kulturê ma yê komelkî nê roşanî fîraz bikerê.
Kurdayetîye û êzidîyî newe ra esasê neteweya demokratîke de ameyî yewca. Êdulê û Derwêşê modernî Kurdîstanê xoserî awan kenê û ey pawenê. Serkewtişê Garê, 8ê Adare, Newroze û şayîyê 4ê Nîsane îsbatê ney ê. Çarşema Sore ya 2021î zî pê nê hîsan yena fîrazkerdene. Ma zî pê nê hîs û fikran roşanê êzidîyan reyna fîraz kenê. Şexsê Mam Zekî, Zerdeşt, Bêşîr, Binevş û Xanêyan de pêro şehîdan reyde yad kenê. Ma sozê xo dibare kenê ke ma seba serfîrazîya na dewaya azadîye têkoşînê xo berz bikerê.”
