Komîteya Şar û Bawerîyan (KCK) bi wesîleya aşma Remezanî eşkerayîye daye û nê pare kerdî:
”Aşma Remezanî ke semedê muslumanan aşmêke bimbarek a dest pê kena. Na aşme de erc û manaya îbadet û tefekkurî cîya yo. Bi na wesîle muslumanî bi roje û dûayan verê xo danê raştîye, edalet, wayûbiratîye û parekerdişî. Ma hevî kenê ke dûayê înan bêrê qebûlkerdene. Ma veng danê ke sere de kurdîstanijî muslumanî emser zafêr wa werê xo nêçaran dir pare bikerê. Ma pê bawer ê ke fermanê ehleqî yê ‘kama/o ke gama ke cîranê ci vêşan bo mird rabikewo ma ra nîyo’ do bêro caardene.
Muslumanî sey her serre emser zî bi problemanê pîlan kewte aşma bimbareke. Bitaybetî Rojheletê Mîyanênî de problmê şarî giranêr ê. Polîtîkayê îşxalî yê rejîmê AKP-MHPyî zî nê problemî dahîna giranêr kerdî. No rejîmo munafiq qirkerdişê kurdan wazeno. Şarê Tirkîya binê zext û zulm de yê. Fîtne kerdo mîyanê welatanê ereban û pêkewtişî xorî kerdî. Dewleta tirke sûrîyeyijê ke kerdî multecî bi înan Yewîya Ewropa rê zî şantaj kena mîlyar Ewroyan înan ra raqilnena. Mîyanê nê probleman de muslumanî nêeşkenê têna roje tepişî ganî semedê çareserîya probleman têbigêrê. Coka ma veng danê ke sere de kurdîstanijî wa muslumanê Rojheletê Mîyanênî vera dewleta tirke ya ke semedê herêma ma janê mergî ya têkoşîno hemparî rayra bêrê. Wa vîrî ra meşiro ke xebata semedê demokrasîyî xeyranê tewr pîlan ra yo.
Vakur û teberê welatî
Fitir û zekatê xo medê dezgahanê dewleta tirke û êyê ke binê nameyanê kurdan de pabesteyê dezgeh û sazgehanê înanê. Goreyê îslamî xeyrê zekatê ke şima danê înan çîn o. Çunke çîyo ke şima danê nê dezgeh û sazgehan sey zulmî şima rê do peyser agêro. Bi wesîleya nê Remezanî ma veng danê şarê xo yê Vakur û teberê welatî ke wa meşiro camîyanê Dîyanetê Tirkî yê ke sey buroyanê îstîxbaratî xebityenê. Nê camîyan de tim nasname, hîsanê dînîyan û ercanê ehleqî yê kurdan rê nêngî yenê çînayene. Meşirê camîyanê înan. Keye û mehleyanê xo de bi îmkananê xo nimaj bikerê. Wina do îbadetê şima zafêr xeyrin bo.
Başûr
Şarê ma yo fedakar ê Başûrî, ma veng danê ke wa waiz û xutbeyan de wa timûtim yewîya neteweyîye ya demokratîke ya Kurdîstanî rojdem de bo. Wa seyda û alîmê Başûrî zafêr paştî bidê xoverdayîşê êzîdîyan ê Şingalî. Ma wazenê reyna bîyarê vîrî ke dewleta tirke pîya hemkaranê ci wazena ke zengînîya maddî ya şima bifîno dest û welatê ma îşxal bikero. Ganî na aşme de hemkar û xayînî zafêr bêrê teşîrkerdene.
Rojhelat
Şarê ma yê Rojhelatê Kurdîstanî pîya bi zextanê rejîmî rîyê janî ra şertanê zehmetan de kewt Remazanî. Ma pê bawer ê ke şarê ma pê hîrakerdişê yewîya xo û pîlkerdişê paştîdayîşî nê zehmetîyan ra vejîyo.
Rojawan
Rojawan de şarê ma binê tehdît û hêrişanê dewleta tirke de dest pê rojeyî keno. Ma hêvî kenê ke şarê ma tîya bi wesîleya rojeyî rêxistinbîyayîşê xo yê neteweya demokratîke pîlêr keno, xopawitişê xo xurtêr keno û herra ci ya ke binê îşxal de ya azad keno.
Çar leteyan de şarê ma wa yewîya xo pîl bikero, hersbîyayeyî wa bêrê were, paştdayîş wa bêro pîlkerdene. Şarê ma wa fitir û zekatê xo bido dezgeh û sazgehanê welatperweran ê kurdîstanî. Paştdayîşê dezgehanê welatperweran wezîfeyê welatperwerîye yo. Remezan sere de semedê muslumananê kurdîstanijan muslumananê demokratîkan rê wa bibo wesîleya xeyrî wa roje, dua û nîyetî înan bêrê qebulkerdene.” BEHDÎNAN
