Ji ber xebatên wê yên sendîkayî yên sala 2012’an ku Hevseroka Sendîkaya Kedkarên Xizmeta Civakî û Tenduristiyê (SES) ya Amedê dikir û delegebûna wê ya Kongreya Civaka Demokratîk (DTK), beriya niha doz li Hevseroka HDP’ê ya Amedê Hulya Alokmen Ûyanik hatibû vekirin. Danişîna doza Alokmen li 9’emîn Dadgeha Cezayê Giran a Amedê hat dîtin. Di danişîna ku Alokmen tev li nebû de parêzerê wê Şeyhmûs Bayhan amade bû.
Dozger, mutaalaya xwe ya di danişîna beriya niha de pêşkeşî dadgehê kiri bû, dubare kir. Parêzerê Alokmen Bayhan derbarê esasê de parastin kir û diyar kir ku delîlên di dosyayê de ji bo sûcdariya ‘endamtiya rêxistinê’ nabin delîl. Bayhan diyar kir ku çalakiyên ku kirine mijara sûc hemû di çarçoveya xebatên sendîkayî de ne û daxwaza beraeta muwekîla xwe kir.
Şandeya dadgeha tirk ji ‘endamtiya rêxistinê’ li Alokmenê 10 sal û 6 meh cezayê girtîgehê birî û derbarê Alokmenê de biryara girtinê da. AMED
