Emîne û Ferît Şenyaşar ku 3 ferdên malbata xwe di êrîşa AKP’iyan de winda kiribûn, 42 roj in li ber Edliyeya Rihayê bi daxwaza ‘edaletê’ çalakî li dar dixin. Malbata Şenyaşar roja şemî û yekşemê ji ber qedexeya derketina derve neçûn ber edliyê. Vê sibê malbat dîsa hat ber edliyê û çalakiya xwe domand.
Serdana ji bo malbatê jî berdewam dike. Jinên parlamenter û rêveberên HDP û HDK’ê serdana malbatê kirin.
Hevberdevka Kongreya Demokratîk a Gelan (HDK) Îdîl Ûgûrlû, Berdevka Meclisa Jinan a HDP’ê Ayşe Acar Başaran, parlamenterên HDP’ê, seroka Partiya Şoreşger Elîf Torûn Oneren, Dayikên Aştiyê di nava şandeyê de cih girtin û serdana xwe di çarçoveya kampanyaya ‘Ji bo jinan edalet’ pêk anîn.
Her roj xwesteka edaletê
Di serdanê de Emîne Şenyaşar lorand û destnîşan kir ku êdî ew nikare vê zilmê îdare bike û xwest edalet pêk were.
Ferît Şenyaşar jî jî anî ziman ku ew bi biryardar in, her roj edaletê dixwazin û heta edalet pêk were dê li vir çalakiya xwe bidomînin.
Hevberdevka HDK’ê Îdîl Ûgûrlû axivî û diyar kir ku di şertek wiha de daxuyanî dayîn jî zilmek mezin e û tevî ku her tişt tespîtkirine jî lê dîsa edalet pêk nayê.
Ûgûrlû destnîşan kir ku heke pir dirêj jî berdewam bike wê heqîqet cihê xwe bibîne û kujer wê cezayê xwe bikişînin û ev kes ji aliyê civakê ve hatine cezakirin û kes wan efû nake û diyar kir ku ew ji êş û kesera malbatê baş fêm dikin û dê her li cem malbatê bin û daxwaza edaletê bikin.
Endamên şandeyê piştî daxuyaniyê kêliyek li cem Emîne Şenyaşar rûniştin û piştgirî dan çalakiya edaletê. RIHA
