Merkezê Xeberan]
Mesaj de ame parekerdene ke 22ê nîsana 1898î de hetê Mîqdat Mîdhed Bedirxanî ra Qahîre de rojnameyêkê bi nameyê ‘Kurdistanî’ ame vetene û nê rojnameyî morê xo da binê tarîxê çapemenîye û roşnvîrî ya kurdkî ya seserra 20. ser. HDPyî da zanayene ke 123 serrî yo rojnamegerê kurdî rêçê Mîqdat Mîdhed Bedirxanî ser o şinê û wayîrê mîrasê înan vejîyenê.
HDPyî ard ziwan ke rojnamegerîya kurdan hînî bîya xeta têkoşîn û xoverdayîşî û rojnamegerîya kurdkî cigêrayîşê raştîye rê dewam kena.
HDPyî vat: ”Rojnamegerê kurdî rixmê hêrişan, sansûran û qirkerdişan bi fedakarî xizmetê şarê xo kenê. Coka tim benê hedefê îqtîdarî. Bi taybetî serranê 90an de xeylêk rojnamegerê kurdî ameyî qetilkerdene û tepiştene. La rojnamegeranê kurdan qetî milê xo nêard war.
Tarîxê çapemenîya kurdkî tarîxê roşnvîrî û xoverdayîşê kurdan o. 20 serrî yo bi taybetî 2016î ra nata AKP çapemenîya kurdan asteng û sansur keno, vera ci hêrişan keno. Vera kurdkî û çapemenîya kurdan dişmenîyêka pîle yena kerdene. Ê waazenê kurdkî bifatisnê la rojnamegerê kurdî û kurdkî sînoran nêşinasnenê û seba serfîrazîye têkoşîn kenê.
22ê Nîsane Roja Rojnamegeranê Kurdan pêro kedkaranê çapemenîya kurdan rê fîraz ba. Ma sere de Apê Musa, Hafiz Akdemîr, Huseyîn Denîz pêro şehîdanê çapemenîya kurdkî bi rêzdarî yad kenê û verê mîras û qerardarîya înan de rîyê xo anê war.”
