Navenda Nûçeyan |
Artêşa dewleta tirk a dagirker, şevê din li dijî herêmên Metîna û Avaşîn ên Qadên Parastina Medyayê ku di nava sînorên başûrê Kurdistanê de ne, êrîşên bejahî û hewayî dan destpêkirin. Artêşa dagirker, îro ji saetên serê sibehê ve jî, êrîşî herêma Zapê kir. Li hersê herêman li dijî êrîşên dagirkeran berxwedana gerîlayên Kurdistanê berdewam dike û derbeyên giran li dagirkeran didin.
Li gel van êrîşan hemû awir vegeriyan ser hevdîtina Serokê Dewletên Yekbûyî yên Amerîkayê (DYA) Joe Biden û serokomarê tirk Tayyîp Erdogan ku duh pêk hatibû. Nexasim êrîşên dagirkeriyê demek pir kurt piştî vê hevdîtina telefonê destpê kirin.
Balkêşe ku Sefaretxaneya DYA’yê ya Enqereyê jî di 14’ê Nîsanê de li ser hesaba xwe ya medyaya dijital de peyam belav kiribû. Di vê peyamê de biryara ku DYA’yê beriya niha dijî rêveberên Tevgera Azadiya Kurdistanê Cemîl Bayik, Duran Kalkan û Murat Karayilan dabûn, hatibû bibîrxistin. Careke banga sîxuriyê hatibû kirin û hatibû gotin ku kesên dê cihê pêşengên Tevgera Azadiyê nîşan bidin, wê bi pereyên zêde werin xelatkirin.
Peyama sefaretxaneya Amerîkayê di nava kurdan de bû sedema nerazîbûnên tund. Çavkanî: Rojnews
