Navenda Nûçeyan |
Kongreya Demokratîk a Gelan (HDK), Şaxên Komeleya Mafên Mirovan (ÎHD) ên Stenbol û Edeneyê û Baroya Amedê li dijî komkujiya 24’ê Nîsana 1915’an a li dijî gelê ermenan daxuyaniyên nivîskî weşandin. Nûnerên saziyan di daxuyaniyê de kesên di komkujiyê de jiyana xwe ji dest dane bi bîr anîn û xwestin heqîqet ronî bibe.
HDK’ê di daxuyaniyê de anî ziman ku hêj li ser gelan komkujî berdewam dike û da zanîn ku Tirkiye wekî berdewama polîtîkayên dewleta osmanî, feraseta înkar û bişaftinê didomîne û dê li dijî polîtîkaên înkar û bişaftinê têkoşîna xwe berdewam bikin.
Şaxên ÎHD’ê yên Stenbol û Edeneyê jî daxuyaniyên nivîskî weşandin û diyar kirin ku bi komkujiyê tenê canê gelê ermenî nekirin armanc û wiha gotin: “Li Îzmît, Eskîşehîr, Kayserî, Sêwas, Erzirom û Wanê li dijî hemû mal û milkê ermeniyan ên dîrokî û çandî yên li Anatoliyayê dest bi talankirinê kirin. Tenê canê gelê ermenî nekirin armanc. Mal, milk û nirxên dîrokî û çandî jî tune kirin. Hemû şopên wan tune kirin.”
Baroya Amedê jî bi heman armancê daxuyaniyek nivîskî da û wiha got: “Em di 106’emîn salvegerê de êşa wan parve dikin. Tehcîra ermeniyan êş û felaketa herî mezin a civakê ye. Ji ber vê yekê 24’ê Nîsanê li hemû cîhanê roja reş e.”
Bila qirkirin were nasîn
Navenda Giştî ya Komeleya Hiqûzanên Ji Bo Azadiyê (OHD) jî têkildarî Komkujiya Ermenan daxuyaniyek nivîskî belav kir û xwest ev qirkirin wek komkujiya ermenan were nasîn û tevahiya mafên ermenan ku mexdûr bûne li wan werin vegerandin.
