Îqtîdarê AKP/MHPyî polîtîkaya zorî esas gêno. Semedo ke îqtîdar de bimanê, çi deste înan ra yeno kenê. Hetan eyro semedo ke HDPyî sîyaset ra derkenar bikê çi destê înan ra ameyo kerdo. Hetta semedo ke partîya HDPyî şarî ra îzole bikê/bikerê, terorîstey ra sucdar kenê. Goreyo ke ma zanê HDP, semedo ke şer vindero, yew xebatêka erjaye keno. Goreyê ma, aşîtîya bi rûmet de, yew qûdsîyet esto. Raşta ey xebata aşîtî de HDP, yew xelate heq keno. Terorîstey ra sucdarkerdişê HDPyî de yew qest esto. Wa rind bizanê ke, weçînayoxê HDPyî; îtîbarê nê vatişan û waştişanê înan nêkenê.
Semedo ke sîyaseten nişnê HDP de başnêkenê, wazenê ke bi mehkemeyan û hepîsxaneyan zerreyê ya veng bikê/bikerê. Semedo ke HDP; sîyaseten zeîf bibo, Hemserekê Demîrtaş û Fîgen Yuksekdag, Îdrîs Baluken tede epey wekîlê HDPyî wekîley ra vistê û dekerdê zîndanan. Yewna het ra şaredarîyanê BDP rê qayûmî tayîn kerdê. Hima-hima heme hemserekê şarederîyan dekerdê zîndanan. Bi des hezaran îdareker û aktîvîstê HDP û BDPyî dekerdê zîndanan.
Nê rojan de zî semedo ke Meclîs ra bêrê vistiş, rayna derheqê des wekîlanê HDPyî de û des wekîlanê CHPyî de fezlekey hedre kerdê. Verî zî ma vat bi ke, eke wekîlanê HDPyî Meclîs ra bêrê vistiş, sira/newbe yena wekîlanê CHPyî. No roj zî eyro yo. Ewta de meqsedê înan; tena Meclîs ra vistişê wekilan nîyo. Hedefê înan; zeyîfkerdiş û çim ra vistişê mûxalefetî yo û saxlemkedişê îqtîdarê AKP/MHP yo. No semed ra zî heme tewir argumanan şuxulnenê. Hêzanê asayîşî ra, hetan dadgehan, brokratan, xezneya dewlete, Meclîsê Tirkîye, hetan medya û zanîngehan vera HDP û mûxalîfanê Tirkîye şuxulnenê. Hetta hima-hima her roj tayê Televîzyonan de, bi taybetî tayê rojnamegeran û sîyasetkaran vera HDP û mûxalefetê Tirkîye danê qalkerdiş. Yewna het ra hem polîtîkaya înan a zerrayê Tirkîye û yê teberê Tirkîye redkerdiş, înkarkerdiş û berterafkerdişê sîyasetê kurdan û mûxalîfan ser o ya. Çunku goreyê înan, HDP sîyaset ra derkenar bo, sîyaset de yew cêf/nefes gênê. La na fehm nêkerde ke HDP, partîya şaran a. Eke HDP bipadîyo, bi yewna name û yewna partîya şaran awan bena.
Sîstemê Serekkomarîye; rejîmê yew merdîmîye yo. Wazenê ke no sîstem; tam cayê xo bigêro û hetan-hetan dewam biko/bikero. No semed ra wazenê ke verî HDP sîyaset ra derkener bikê, dima zî CHP û partîyanê binan şarî ra îzole bikê. Wazenê ke HDP, CHP û partîyanê binan çimde şaran de bê bih û bêîtîbar bikê. Rasta ey no xusus de serkewtişê înan tike zor o. Hinê qoltuxê xo emnîyet de nêveynenê. Çende zilm û zor kenê, ende rayê înan kemî benê. Mesela anketanê peynîyan de rayê AKP, se ra 30 de, rayê MHP zî bindê bendî/barajî de nawnênê. Yanî eke yew weçînayîş bibo, Tifaqa Komarî, weçînayîşî vînî kena.
Îqtîdarê AKP/MHPyî tede, partîyê ke hetan eyro ameyê îqtîdar, tena menfeetê xo û menfeetê yê derûdorê xo esas girewto. Yanî Tirkîye de, partîyê sîstemî ke yenê îqtîdar; seba menfeetê xo yê madî û qoltuxê xo xebitênê. Tirkîye de pereyê Tirkîye qîymet ra kewto. Karmendan, karkeran û bêkaran, adeta veyşaney reyde terbî/terbîye kenê. Tirkîye de hinê esameyê heq huqûq zî nêmendo. Polîtîkaya zorî ra vêşêr yewna çîy deste înan de nêmendo. Îqtîdarê AKP/MHPyî; şaranê Tirkîye het de hinê kredîyê xo qedînayo.
