Berdevka HDP’ê Ebrû Gunay li Navenda Giştî ya HDP’ê civîna çapemeniyê li dar xist û bal kişand tecrîda li ser Rêberê Gelê Kurd Abdullah Ocalan.
Ebrû Gunay destnîşan kir ku Ocalan muxatabê bingehîn ê meseleya kurd e û wiha got: “Ocalan ne tenê girtiyeke ku divê mafên wî yên hiqûqî bên dayîn. Ocalan di çareseriya demokratîk a meseleya kurd de, lewma di avakirina Komara Demokratîk de aktorekî polîtîk ê bingehîn e ku divê bê dîtin.”
Gunay diyar kir ku asta neçareseriyê ya meseleya kurd û bi vê ve girêdayî sîstema îşkence û tecrîdê ya li ser Ocalan ne tenê nayê qebûlkirin, di heman demê de gihîştiye wê astê ku metirsîdar bûye û wiha domand: “Yên ku ji bo xatirê dengan siyaseta qirkirinê ya AKP-MHP’ê ya li dijî kurdan dipejirînin, divê zanibin ku bi tasfiyekirina destketiyên demokratîk ên kurdan re ne tenê siyaseta kurd a demokratîk dê winda bike. Polîtîkaya tecrîd, qeyûm û tasfiyekirinê ya li ser gelê kurd û Ocalan, ger berxwedana kurd a demokratîk têk bibe, wê welat bibe qadeke welê ku rejîma yek şexsî heta bi hetayê lê serwer be.
Dîrokê têkoşîna azadiyê ya gelê kurd û têkoşîna demokrasiyê ya gelên Tirkiyeyê tu carî ewqasî neçarî hev nehiştibû, çarenûsa wan ewqasî hevpar nekiribû. Lewma di rewşa heyî de rabûna li ber sîstema îşkence û tecrîdê ya li Îmraliyê tê wateya xwedîderketina li paşeroja demokratîk a hevpar. Têkoşîna ji bo pêkanîna hiqûqê li Îmraliyê, dê bibe têkoşîna sererastkirina hiqûqê li welêt.”
Wezîfeya muxalefetê çareserkirina pirsgirêkan e
Di axaftina xwe Ebrû Gunay da zanîn ku desthilatdarî baş zane heta ku têkoşîna rêxistinbûyî ya gelê kurd tasfiye neke wê nikaribe xwe mayinde bike, lewma bi vî rengî tevdigere û ev tişt anî ziman: “Polîtîkayên li ser birêz Ocalan û gelê kurd tên meşandin gelekî metirsîdar in û em hişyariyê didin desthilatdariyê. Bi navê HDP’ê, di serî de tecrîda li Îmraliyê em tu nêzîkatiyeke ji rêzê qebûl nakin. Wezîfeya muxalefetê ne ew e ku hînî pirsgirêkan bibe û bi rengekî normal pêşwazî bike. Wezîfeya muxalefetê çareserkirina pirsgirêkan e.”
Banga ji bo hêzên demokrasiyê
Her wiha Gunay destnîşan kir ku hêza wan heye ku pirsgirêkên civakî hemûyan çareser bikin û axaftina xwe wiha bi dawî kir: “Em bang li her kesên pêwendîdar dikin ku bi rengekî cidî nêzî meseleyan bibin. Em bang li hêzên demokrasiyê jî dikin ku di xeta rêya sêyemîn de di têkoşîna siyasî civakî de bibin hev. Gelê kurd û hêzên demokrasiyê yên Tirkiyeyê yên xwedî wijdan vê polîtîkaya dijminane û tecrîdê qebûl nakin û di her şert û mercî de wê nîşan bidin ku vê qebûl nakin.” ENQERE
