Cemîl
Navenda Nûçeyan |
Komîteya Rewşa Lezgîn a ji bo Rojava ji bo sê pêşengên PKK’ê Cemîl Bayik, Dûran Kalkan û Mûrat Karayilan nameyek ji Wezîrê Karê Derve yê Amerîkayê Anthony Blinken re şand.
Nameya bi îmzeya Seroka komîteyê Meredith Tax, Sekretera Giştî Debbie Bookchin û Dîrektora Îdarî Ozlem Gonder, ji Blinken re hate şandin. Di nameyê de ji rêveberiya Biden hate xwestin ku siyaseta durû ya serokê berê yê Amerîkayê Donald Trump a li dijî kurdan biterikîne.
Di nameyê de gotinên serokê Amerîkayê Joe Biden ên civîna çapemeniyê ya 4’ê sibatê hate bibîrxistin ku Biden hingî gotibû, polîtîkaya derve ya DYE’yê dê li ser bingeha mafên mirovan bê rûniştandin û hate ragihandin ku nûkirina biryara li dijî lîderên PKK’ê Cemîl Bayik, Dûran Kalkan û Mûrat Karayilan, ji bo sûîqestê rê dide Tirkiyeyê.
Di nameyê de hat destnîşankirin ku stratejiya AKP’ê li dijî berjewendiyên DYE’yê ye, lewma divê bê terikandin.
Di nameyê de hat bibîrxistin ku polîtîkayên ku serokkomarê tirk Recep Tayyîp Erdogan dimeşîne, piştgiriyê dide DAIŞ’ê û hevkariya bi komên çete yên bi Ceyş el Îslam, Tûgayên Sûltan Mûrat bi belgeyan hatiye ispatkirin. Di nameyê de her wiha ev gotinên Brett McGurk jî hate bibîrxistin: “Gelek komên muxalîf ên sûriyeyî yên Tirkiye piştgiriya wan dike, li şûna ku li dijî DAIŞ’ê şer bikin, bi rengekî aşkera ragihandine ku ew dixwazin li dijî kurdan şer bikin, lewma komên tundrew e.”
Di nameyê de hat destnîşankirin ku PKK rêxistineke terorîst nîne, rêxistineke rizgariya neteweyî ye ku sala 1995’an mohra xwe daniye binê Konvansiyona Cenevreyê û hat xwestin ku xelata ji bo girtina lîderên PKK’î hatine danîn bê betalkirin.
