Meclisa Partiya Jiyana Azad a Kurdistanê (PJAK) têkildarî êrîşên çeteyên DAIŞ’ê ya li ser rojhilatê Kurdistanê bi taybet li bajarên Merîwan, Saqiz û Sine daxuyaniyek da.
PJAK’ê ragihand ku rejîma Îranê jî dixwaze mîna Tirkiyeyê çeteyên DAIŞ’ê ji bo berjewendiyên xwe li dijî gel bide şerkirin û diyar kir ku Tirkiye û Îran bi rengên cuda piştgirî didin komên dijî mirov û demokrasiyê.
PJAK’ê destnîşan kir ku li Sûriye û Iraqê çeteyên DAIŞ’ê yên ku gelek dever kirin bin kontrola xwe de, yekane hêza li dijî şer kir û têk bir gelê kurd bû û wiha got: “Niha jî komara îslamî ya Îranê dixwaze van komên çete li rojhilatê Kurdistanê bixin di bin kontrola xwe de û di bin navê hêza ewlehiyê de, nakokî derxîne, di mercekî derketina krîzan de li dijî gelê şoreşger bikar bîne.”
DAIŞ û îslama siyasî ya tundraw
Di daxuyaniyê de PJAK’ê da zanîn ku DAIŞ û îslama siyasî ya tundraw rûyê xwe yê dizî û dij mirovahiyê nîşanî tevahî cîhanê daye û wiha pêde çû: “Gelê me jî li dijî vê yekê ji gelê herî zerermend e, bi xwîn û goşt li beramberî van komên terorîst berevanî kiriye. Dewleta tirk û Îran bi şêwazên cuda destek û piştevaniya van komên çete û koneperest dikin ji bo pêşerojê bi rengên cuda li dijî gelê me û ruhî demokrasî ya li navçe û herêmê bidin bikaranîn.
Di rojên borî de li rojhilatê Kurdistanê êrîşeke tundraw a îslamiya siyasî li ser gelê me pêk hat. Bi taybet li bajarên Merîwan, Saqiz û Sine êrîşên nerewa bi hincetên cêwaz êrîşî xelkê sivîl hatiye kirin. Dem û şêwazê êrîşê dide nîşandan ku ev yek bi plan û rêxistinkirî tê kirin, bi taybet bi piştevaniya hêza Komara Îslamî ya Îranê bi rê ve diçe û armancên taybet li pişt hene.”
Piştevaniya Tirkiye û Îranê
Di dewama daxuyaniyê de PJAK’ê bal kişand ser piştevaniya Tirkiye û Îranê ya ji bo çeteyên DAIŞ’ê û ev tişt anî ziman: “Çawa ku Tirkiye ji bo armancên taybet pişgtirî da DAIŞ’ê, bi heman siyasetê Komara Îslamî jî dixwaze li rojhilatê Kurdistanê em kom û çeteyan bixe di bin kontrola xwe de û di bin navê hêzên ewlekariyê de nakokî derxîne, di mercekî derketina krîzan de li dijî gelê şoreşger û bikar bîne.”
‘Hêza gelê Rojhilat heye’
Her wiha PJAK’ê bi bîr xist ku dema DAIŞ li Iraqê êrîşî Mûsil û Şengalê kir, dîsa li Sûriyeyê êrîş kir, ne hêza Iraqê û ne jî Sûriyeyê nikarîn xwe li ber DAIŞ’ê bigirin û beşek mezin a xaka van herêman xist bin kontrola xwe û daxuyanî wiha bi dawî bû: “Her kes baş dizane, çawa gelê kurd ê şoreşger li beramberî DAIŞ’ê rawestiya û çeteyên dijminê mirovahiyê têk birin. Bi heman rengî gelê me yê li rojhilatê Kurdistanê hêza wan a şer heye li dijî çeteyên DAIŞ’ê û çeteyên şaîa (rejîma Îranê) bike. Ev kom ji aliyê komên diyar ve tê birêvebirin, gelê em vê yekê qebûl nake û cihê wan jî di nava gelê me de nîne.
Gelê me yê rojhilatê Kurdistanê çawa bi piştevaniya xwe li Kobanê, Şengal û hemû navçe û bajaran dawî li dijî çeteyên tundrawa derketin û têk birin, niha jî ciwan, mamosteyên olî, hemû ferdên civakê, li dij radiwestin û rê nadin ku ev hişmendiya koneperest li Kurdistanê xwe bi cih bike.” ŞAHO
