Navenda Nûçeyan |
Komîsyona Kedê ya Partiya Demokratîk a Gelan (HDP) bi boneya Hefteya Têkoşîna li Dijî Birçîbûnê daxuyaniyeke nivîskî parve kir. Di daxuyaniyê de hat diyarkirin ku pergala heyî ji bo têkçûna birçîbûnê tênakoşe, birçîbûnê xurtir dike. Li cîhanê 2 milyar û nîv însan bi birçîbûnê re rû bi rû ne.
Di daxuyaniyê de hat destnîşankirin ku li Tirkiyeyê ji sedî 60 xebatkar bi mûçeyê kêmtirîn dixebitin, ev nêzîka 20 milyon kes dike û wiha hat gotin: “Tevê kesên ku ji kar hatine derxistin hejmara kesên di biniya sînorê birçîbûnê de dijîn 30 milyon e. Pergala kapîtalîst li aliyeke hin kesan zengîntir dike li aliye din jî hejmara xizanan zêdetir dike.”
Birçîbûn gihiştiye lûtkeyê
Komîsyonê di daxuyaniya xwe de bi bîr xist ku Tirkiyeyê di 24’ê çileya 1984’an de neo-lîberalîzmê xistiye polîtîkaya aboriyê û ev tişt gotin: “Hikûmeta AKP’ê di 10 salên dawî de hilberînê nekiriye tim xerîdariyê kiriye. AKP’ê di desthilatdariya xwe de bêsendîkabûyînê û ji kar derxistinê kiriye hedefa xwe. Tirkiye bi polîtîkayên xwe kesan ber bi întixarê ve dibe.”
Di daxuyaniyê de komîsyonê aşkera kir ku mûçeyê kêmtirîn di bin sînorê birçîbûnê de ye, Tirkiye bi van mûçeyan dixwaze hemwelatiyên xwe bi birçîbûnê terbiye bike û bi zêdebûna bûhayê xurekan birçîbûn li Tirkiyeyê gihiştiye lûtkeya herî jor.
