Navenda Nûçeyan |
Konseya Rêveber a KNK’ê têkildarî astengiyên rêveberiya PDK’ê yên li pêşiya dostên kurdan datîne, daxuyaniyek da.
Daxuyaniya KNK’ê wiha ye:
“Weke tê zanîn nêzî 50 roj in dewleta tirk êrîşî başûrê Kurdistanê dike. Li herêmê gundan vala dike, bax û baxçe jî di nav de xwezaya herêmê dişewîtîne û talan dike. Êrîşî penaberên Mexmûrê dike û mirovên bêguneh dikuje. Gelê herêmê û gelek rêxistin bang dikin ku gel û dostên gelê kurd li hember dewleta tirk helwest bigirin û xwedî li gelê herêmê û berxwedêran derkevin.
Li hember vê rewşê, gelê me û dostên gelê kurd, dikevin nava lêgerînan û li gorî xwe li çareseriyan digerin. Yek ji van lêgerînan jî ew e ku ji bo xwedîderketina gel û ji bo li hember êrîşên dewleta tirk helwest bigirin û dengê xwe derxin, hinek dostên gelê kurd çûne başûrê Kurdistanê. Çûna van dostan ji bo piştgirî û xwedîderketina gelê Kurdistanê ye. Ji bo hevdîtin, aştî û diyalogê ye.
Lê mixabin hinek rayedarên Hewlêrê, van dostan asteng dikin û nahêlên rehet karê xwe bikin. Bi navê wezareta navxwe daxuyanî dan ku ev daxuyanî van dostan reş dikin û wan weke çalakvanên dijê asayîşa herêmê didin nîşan. Bi tevahî ew daxuyanî û ew îdîa ji rastiyê dûr in û ne li xizmeta gel û berjewendiyên herêmê de ne. Tiştekî bi wî rengî nîne û ew kes bi temamî ji bo piştgiriya gelê kurd çûne wê derê.
Ew kesên çûyîn Başûr, dostên gelê me ne. Wan kesan û hevalên wan, di berxwedana Kobanê de, şerê Efrîn, Girêspî û Serêkaniyê de û li berxwedana Şengal û gelek deverên din ên Kurdistanê, cihê xwe li cem gel û berxwedêrên kurd girtine û bedel dane. Her wiha van kesan di asta cîhanî de doza gelê kurd bi awayekî pozîtîf dane naskirin û weke dîplomatên kurd xebitîne. Ew niha jî bi vê nêtê, bi vê helwestê hatine Kurdistanê. Ew mêhavanên ezîz ên Kurdistanê ne. Pêwîst e em mêhvanperweriya xwe li hember wan bidin nişandan, pêwîst e ew weke mêhvan bêne pêşwazîkirin û hembêzkirin.
Bi vê munasebetê, em bang li hikûmet û asayîşa Herêma Kurdistanê dikin ku van dostan asteng nekin, rê li ber wan xweş bikin û wan weke mêhvan bibinîn.
Em bang li hemû hêz û rêxistinên kurdistanî û gelê başûrê Kurdistanê dikin ku van dostan mêvan bikin û xwedî li wan derkevin. Her wiha em hemû bi hev re bi dostên xwe re, li hember êrîş û dagirkeriya dewleta tirk, helwest nîşan bidin û xwedî li hêzên berxwedêr derkevin.”
