Kovara Edebîyatî ya Destare bi xebatêka hempar ê nuştox û şaîranê kurdan dest bi weşanî kena. Kovare do bi zarawayê kirmancî, soranî û kirmanckî weşan bikera û do 3 aşman de reyêk bivejîya. Hûmara yewine ya kovare do aşmanê Hezîrane- Temmuze- Tebaxe de biresa verê destê wendoxan û 60î ra zêde nuşte do tede bibî. hûmara yewine 250 ripelanra pê yena.
Kovara ke bi paştîdayîşê Enstîtuya Kurdî ya Amedî bi siloganê ‘Destara kurdî hûrdî tehnayîş’ vejêna do çend rojan ra dima biresa verê destê wendoxan. Heto bîn de tay materyalanê ci yê tewri bi tewiran rayîrberîya PENê Kurdî, Enstîtuya Kurdî ya Stenbolî, MED-DER, Komeleya Edebîyatî ya Kurdî, Komeleya Nuştoxanê Mezopotamya, Enstîtuya Kurdî ya Stockholmî, Enstîtuya Kurdî ya Almanya, Enstîtuya Kurdî ya Brukselî, Enstîtuya Kurdî ya Swîsre û xeylê nuştoxî tede estî.
Hemmudirê Weşanê Pêroyî yê Kovare Reyhan Îke û Hemîd Dilbiharî yî. Heyetê Weşanî û Şêwirmendîye de zî Abdula Peşêw, Ehmed Huseynî, Bêrîvan Doskî, Mizgîn Ronak, Celîlê Celîl, Zerdeşt Haco, Rênas Jiyan, Ezîzê Cewo, Kamran Simo Hêdillî, Medenî Ferho, Gulgeş Derya Spî, Zana Farqînî, Samî Tan, Omer Ûlûçay, Adar Jiyan, Sayîme Xakpûr, Eslîxan Yildirim û Avesta Aydinî estî.
Hemmudirê Weşanê Pêroyî yê Kovare Hemîd Dilbihar derheqê vetişê kovare de Ajansê Mezopotamya rê qisey kerd. Dilbihar qiseykerdişê xo de ard ziwan ke edebîyat qasê tarîxê merdimîye kehen o û bado ke merdimayî tewrê komelî bîyî û komelbîyayîş vejîya raşte, edebîyat tewrê cuye bî û wina dewam kerd: “Cayê cabîyayîşê yewine yê komelbîyayîşî cografyaya Kurdistanî ya. Coka ra edebîyatê kurdî, edebîyatê fekkî xeylê hetan ra bîyo çimeyê merdimayî. Edebîyatê kurdî qasê xoserîya xo, hende zî gerdunî yo. Labelê sey xeylê reyan heqîqet tay sebeban vera nêvejîyayo raşte.”
Amacê kovare
Dilbiharî tewr peynî vat kes eyer hetê cuye edebîyat zî ameyo talankerdiş û wina donma: “Têkoşînê azadîye ê kurdan, senî ke çarçeweya gerdunî de xeylê hetan ra serkêşîya merdimayî keno û heqîqet dano teber, wayîrê no tecrubeyîyo ke hetê ziwan, edebîyat û fehmî de zî bikero. Sey xeylê raşteyan, raşteyê edebîyatî de zî çinî ameyo hedibnayîş. La êdî wext ameyo ke kurd bi heqîqetê xo yê gerdunî bivejîyî serê sehneyê tarîxî. Destar nê esasan sero vejîya raşte.”
