Di 13’yê hezîranê de balafirên şer ên dewleta tirk a dagirker li herêma bajaroka Pişder a Silêmaniyê wesayîtek sivîl bombebaran kir. Di encama êrîşê de 4 kes şehîd bûn. Yek ji wan Ebas Îbrahîm Mehmûd ê xelkê Silêmaniyê bû. Îro cenaze ji Qeladizê anîn Silêmaniyê û li Silemaniyê bi aliyê gelek kesan ve hate pêşwazî kirin. Piştre cenaze ji Mizgefta Mezin a Bekirec bi dirûşmeyan ber bi Goristina Bekireco ya Silêmaniyê ve hate oxirkirin.
Endamên Tevgera Azadî ya Civaka Kurdistanê (Tevgera Azadî), Rêxistina Jinên Azad a Kurdistanê (RJAK), Komîteya Şehîdên PKK’ê yên Başûrê Kurdistanê, malbatên şehîdan û gelek welatî tev li merasîmê bûn.
Şehîd Ebas şehîdê hemû Kurdistanê ye
Di merasîma oxirkirinê de Komîteya Malbatên Şehîdan a PKK’ê ya Başûrê Kurdistanê daxuyaniyek da. Di daxuyaniyê de soz hat dayîn ku dê rê nedin xwîna şehîd Ebas vala here û armancên şehîdan bi ser bixin.
Di dewama daxuyaniyê de hat gotin ku malbat, xelkê deverê û her çar parçên Kurdistanê bi şehîdan serbilind in û bang li hemû aliyan hat kirin ku li dijî karên qirêj ên dewleta tirk helwest nîşan bidin.
Her wiha Komîteya Malbatên Şehîdan got ku Şehîd Ebas şehîdê hemû Kurdistan û gelên çewisandî ye û diyar kir ku yekitiya neteweyî dikare hemû plan û dagirkeriyên dijmin vala derxîne.
Xwişka Şehîd Rêdûr: Birayê min bi destê sîxûr û xiyanetkaran şehîd bû
Di merasîma oxirkirinê de xwişka Şehîd Rêdûr jî ji çapemeniyê re axivî û wiha got: “Bi şehadeta birayê xwe serbilind im ji ber ku ew şehîdê hemû Kurdistanê ye û di ber kerameta kurdan de şehîd bû.”
Her wiha xwişka şehîd diyar kir ku şehîd Rêdûr şehîdê serfirazî û rizgariyê ye û ragihand ku şehîd Rêdûr bi destên sîxûr û xiyanetkaran hatiye şehîdkirin.
Ji aliyî din ve duh cenazeyê Şehîd Ebubekir Tufîq ê ku di heman êrîşê de şehîd bibû li Qeladizê hatibû veşartin. SILÊMANÎ
