Merkezê Xeberan
Camêrdo bi çekin O.G dekewt bînaya Partîya Demokratîke ya Şaran (HDP) ya Îzmîrî û xebatkara HDPyî Denîze Poyraz qetil kerd. O.G waşt binaya HDPyî bido adir ver. Hêrişkaro nijadperest ame destbendkerdene. Serebûtî ra dima Meclîsê Cinîya ê HDPyî û Tevgerê Cinîyanê Azadan (TJA) serê hesabanê xo tweettîr ra reaksîyon mojnayî. Meclîsê Cinîya ê HDPyî eşkerayîya xo de vat ke ‘Cinî do hesabê qetlîyamî bipersî’ û TJA wina vat ‘Wa herkes bizano ke têkoşînê azadîye ê cinîyan de qetlîyamo ke hesabê ci nêameyo perskerdene çin o’.
Hêrişê vera bînaya Partîya Demokratîke ya Şaran (HDP) ya Îzmîrî ke netîceyê ci de Deniz Poyraze hetê hêrişkaro nijadperest O.Gyî ra ameye qetilkerdene ra dima, Meclîsê Cinîya ê HDPyî û Tevgerê Cinîyanê Azadan (TJA) serê hesabanê xo tweettîr ra reaksîyon mojnayî.
‘Cinî do hesabê qetlîyamî bipersî’
Meclîsê Cinîyan ê HDPyî mesajê xo de wina va: “Îqtîdar û hemkarê ci ke bîyî sebebê qetilkerdişê embaza ma Denîz Poyraze do hesabê pêroyê hedefnîşandayîşan bidî. Cinî do hesabê qetlîyamî bipersî.”
‘Qetlîyamo ke hesabê ci nêameyo perskerdene çin o’
TJA zî mesajê xo de înan vat: “Ewro bînaya HDPyî ya Îzmîrî de vera aktîvîsta ma de hêrişêko wehşîtî virazîya. Hêriş bi hemkarîya dewlet- camêrdî virazîya û embaza ma Denîz Poyraze ameye qetilkerdene. Wa herkes bizano ke têkoşînê azadîye ê cinîyan de qetlîyamo ke hesabê ci nêameyo perskerdene çin o.”
