Navenda Nûçeyan |
Êrîşkarê çekdar Onûr Gencer, bi ser avahiya HDP’ê ya Îzmîrê de girt û xebatkara partiyê Denîz Poyraz qetil kir. Êrîşkar dema ku hewl da agir berî avahiyê de hat binçavkirin.
Endamê Lijneya Birevebirina Navendî (MYK) ya HDP’ê Mahfûz Guleryuz, derbarê êrîşê de axivî û diyar kir ku êrîş plan kiriye.
Guleryuz destnîşan kir rexmî ku li pêşiya avahiya HDP’ê ya Îzmîrê qereqola polîsan heye jî ev êrîş pêk hatiye û ev tişt gotin: “Beriya bi mehan gotin ku wê li vî welatî cinayetên siyasî pêk werin. Îro provaya wê hat kirin. Êrîşkar hatiye ku parlamenter, endamên MYK’ê, hevserokên bajar qetil bike. Ev dewlet dizane. Tişteke wisa jixweber nîne. Kes nikare vê bi me bide bawerkirin. Divê HDP’î, HDP û kesên ku demokrasiye diparêzin li vî welatî bên parastin. Ji bilî van hemû mafya û çete ne. Tev jî di bin emrê Suleyman Soylû de ne û li benda îşareteke wî ne. Tev jî amade ne ku êrîşî me bikin û me bikujin. Di vê rewşê de jî hin kes tên gef li me dixwin.”
