Ewro saetanê serê sibayî de hêrişkaro bi nameyê Onur Gencerî hêrişê bînaya Partîya Demokratîke ya Şaran (HDP) ya Îzmîrî kerd. Hêrişkaro nijadperest xebatkara partîye Denîz Poyraze qetilkerd û bîna da adir ver. Fotografê qatil Onur Gencerî ke serê hesabê xo yê medyaya komelkî de pare kerdbî vejîyayî raşte. Badê serebûtî Gencer berdî şûbeyê TEMî ê Îzmîrî û îfadeyê xo yê ewil de herçiqas ke vajo “Kesêk reyde têkilîya mi çin o. Seba ke ez PKKyî ra nefret kena, dekewta bîna. Mi rast ci ame gule reşêna” zî fotografan ra zûrê ci asîyenê.
Hesabê Instagramî ê bi nameyê “onur_gencer1994” ke aîdê hêrişkaro nijadperestî yo de vîşêrê parekerdişê fotografan vatişê nijadperestî û fotografê bi çekin zî estî. Hêrişkar verê qetlîyamî reyna eynî hesab ra hîkaye pare kerdo û ewja de vatişanê nijadperestî û nefretin xebetnayo.
Sûrîye de fotografê bi çekin
Parekerdişanê hêrişkarî de tewr zêde fotografê bi çekin estî. fotografê model û çapê cîya cîyayî ê çekan estî û sewbîna çekê namluyê bi dergin zî estî. Heto bîn de fotografan ra kismêk Sûrîye de bajaranê cîya cîyayan de ameyî antene.
Fail, fotografêk de bajarê Surîye yê Menbic de mîyanê mewzîyêk de, destê ci de çeko ke lûlaya ci derg o bi notê “Vîrardişê Surîye” pare kerd, destê ci de çeko ke modelê MPT-76 zî mîyanê TSKyî de yeno xebitnaye yo.
Fail Onur Gencer, fotografêk bîn yê Helebî de bi kamuflajê leşkerî îşaretê “bozkurt” keno. Cayêkê fotograf ameyo antene, sey cayêk leşkerî aseno. Hêrişkero nîjadperest fotogragêk bîn de zî kamuflajê leşkerî serê hîn kesan de yeno vînayene.
Nê fotogragê ke ameyê antene, ramojneno ke serrê peyênan de Sûrîye de ca girewto. Mudaxilbîyayîşê Tirkîya yê şerê Surîye û operasyonê vakur û rojhelatê Surîye de operasyonê leşkerî kerdî de xeylêk zanayîş û belgeyan de nê paramiliterî xebitnayê rayaumûmî rê ameyî parakerdene û raporê mîyanneteweyî rê zî bî babete.
Nê operasyonan de nameyê Sanayîyê Înşaatê Ercnayîşê Pawitişê Mîyanneteweyî (SADAT) vejîya vernê. Mîyanê awankerdoxê SADATî de Adnan Tanriverdî, şewirmendîyê Serekeyî Pêroyî yê AKP û şewirmendîyê Serekkomar Tayyip Erdoganî zî kerd.
