Înîsîyatîfê Kurdîstanî Bipawê (Defend Kurdistan) herêma Qeredaxî de dewa Rizgarî zîyaret kerde û çarçewa pêvînayîşanê Başûrê Kurdîstanî de Komeleya Zehmetkêşan a Rojhelatê Kurdîstanî de ronişt.
Goreyê agahîyan kombîyayîş de qala armancê heyetî ameye kerdene. Heyetî da zanayene ke armancê înan vergirewtişê hêrişanê Tirkîya û caardişê yewîya kurdan o.
Endamê Heyetê Îdareyî yê Komeleya Zehmetkêşan Newîd Mîhrawerdî kombîyayîşî ra dima qisey kerd û vat: ”Ma heyet pêşwazî kerd û reyna paştdayîşê xo înan rê pare kerd. Pêro xîretê ke seba vergirewtişê şerî yo ma rê girîng ê. Ma hêvîdar ê ke ê do biresê armancê xo.”
Pêvînayîşêko bîn zî rêxistina Komala reyde ame kerdene ke Rojhelatê Kurdîstanî de kar keno. Îdarekaranê Partîya Komala ra Riza Kabeyî pare kerd ke hêrişanê dewleta tirke de xeylêk sivîlî merdî û îfade kerd ke ganî kurdî Kurdîstanê azadî awan bikerê.
Partîya Kedkare ra zî Îbrahîm Alî Zadeyî qisey kerd û eşkera kerd ke dewleta tirke hêrişanê îşxalî de sînoran nêşinasnena û vat: ”Amerîka, Iraq û hêzê mîyanneteweyî vera hêrişan bêveng ê. Ganî Ewropa verê nê hêrişan bigêra.” Çime: Anf
